شاہ سلمان اور ترک صدر کا شام کی صورت حال پر اظہارِ تشویش
ترک صدر رجب طیب ایردوآن نے سعودی عرب کے فرمانروا شاہ سلمان بن عبدالعزیز سے ٹیلی فون پر شام کی تازہ صورت حال پر تبادلہ خیال کیا ہے۔
ترک صدر کے دفتر کی جانب سے جاری کردہ بیان کے مطابق دونوں لیڈروں نے شام کے شمالی شہر حلب کے شمال میں روسی اور اسدی فوج کے شہریوں پر فضائی حملوں پر گہری تشویش کا اظہار کیا ہے۔
انھوں نے کہا کہ جب تک شامی صدر بشارالاسد اقتدار میں رہتے ہیں،اس وقت تک شامی تنازعے کا حل ناممکن ہے۔دونوں لیڈروں نے شہریوں پر روس اور اسدی فوج کے فضائی حملے بند کرنے اور محاصرہ زدہ شہروں اور قصبوں کی ناکا بندی ختم کرنے کا مطالبہ کیا ہے۔ان کا کہنا تھا کہ ان حملوں سے علاقے میں انسانی صورت حال بد سے بدتر ہوتی جارہی ہے۔
صدر ایردوآن اور شاہ سلمان نے کرد ملیشیا پی وائی ڈی کے شام کے ترکی کی سرحد کے نزدیک واقع شمالی قصبے اعزاز میں حملوں اور ان کے ردعمل میں ترک فوج کی سرحد پار سے گولہ باری سے پیدا ہونے والی صورت حال پر بھی تبادلہ خیال کیا ہے۔
