.

ویسٹ انڈیز کے کرس گیل کا ٹیسٹ میچ کی پہلی گیند پر چھکّا

ٹیسٹ کرکٹ کی 135 سالہ تاریخ میں نیا ریکارڈ رقم

پہلی اشاعت: آخری اپ ڈیٹ:
ویسٹ انڈیز کے جارحانہ انداز میں بائیں ہاتھ سے کھیلنے والے بلے باز کرس گیل نے کرکٹ ٹیسٹ کی تاریخ میں ایک نیا ریکارڈ اپنا نام کرلیا ہے اور وہ کسی ٹیسٹ میچ کی پہلی ہی گیند پر چھکا لگانے والے دنیا کے پہلے بلے باز بن گئے ہیں۔

کرس گیل نے یہ کارنامہ منگل کو شیربنگال نیشنل اسٹیڈیم میرپور، ڈھاکا میں بنگلہ دیش کے خلاف کھیلے جارہے پہلے ٹیسٹ میچ کے پہلے روز انجام دیا ہے۔اتفاق سے جس بنگلہ دیشی باؤلر کی گیند پر انھوں نے چھکا لگایا وہ بھی اپنا پہلا ٹیسٹ میچ کھیل رہے تھے۔اس آف سپنر باؤلر کا نام سہاگ غازی ہے اوربنگلہ دیشی کپتان نے کسی فاسٹ باؤلر کو پہلا اوور دینے کے بجائے ان سے بالنگ کا آغاز کیا۔ان کے پہلے اوور میں کرس گیل نے اٹھارہ رنز بنائے۔

کرس گیل نے ڈھاکا ٹیسٹ میں اپنی اننگز کا آغاز تو بڑے جارحانہ انداز میں کیا لیکن وہ چوبیس رنز بنا کر سہاگ غازی کے تیسرے اوور میں محمود اللہ کے ہاتھوں کیچ آؤٹ ہوگئے۔ویسٹ انڈیز نے بنگلہ دیش کے خلاف پہلے دن کھیل کے اختتام پر چار وکٹ کے نقصان پر 361 رنز بنائے تھے۔

یاد رہے کہ برطانیہ اور آسٹریلیا کے درمیان پہلا ٹیسٹ میچ میلبورن کرکٹ گراؤنڈ پر 15مارچ1877ء سے کھیلا گیا تھا۔کرکٹ کی ایک سو پینتیس سالہ تاریخ میں ماضی میں کسی بھی بلے باز نے اپنی اننگز کی پہلی ہی گیند پر چھکا نہیں لگایا تھا۔تینتیس سالہ کرس گیل اب تک ترانوے کرکٹ ٹیسٹ میچ کھیل کر چھے ہزار چھے سو تین رنز بنا چکے ہیں۔انھوں نے دو سو چونتیس ایک روزہ بین الاقوامی میچ کھیلے ہیں اور آٹھ ہزار تین سو ساٹھ رنز بنائے ہیں۔