اردن میں ٹریفک حادثے کے نتیجے میں پانچ سعودی شہری جاں بحق

اردن میں ایک المناک ٹریفک حادثے کے نتیجے میں کم سے کم پانچ سعودی شہری جاں بحق ہوگئے۔

یہ واقعہ اردن میں جابر بین الاقوامی شاہراہ پر المفرق گورنری کے قریب پیش آیا۔

اردن کے ڈاریکٹر سیکیورٹی جنرل کے ترجمان کرنل عامر السرطاوی نے العربیہ ڈاٹ نیٹ کو بتایا کہ یہ المناک ٹریفک حادثہ المفرق گورنری میں پیش آیا جس میں پانچ سعودی شہری جاں بحق ہوئے ہیں۔ حادثے میں ایک نامعلوم شخص کی موت کی بھی تصدیق کی گئی ہے۔

جاں بحق ہونے والے تمام سعودی شہریوں کی میتیں المفرق کے سرکاری اسپتال منتقل کی گئی ہیں جب کہ زخمیوں کو علاج کے لیے دوسرے اسپتالوں میں لایا گیا ہے۔

درایں اثنا اردن میں قائم سعودی عرب کے سفارت خانے کی طرف سے جاری کردہ ایک بیان میں کہا گیا ہے کہ ٹریفک حادثے کے بعد سفارت خانہ تمام صورت حال پرنظر رکھے ہوئے ہے۔ سعودی عرب کے سفیر نایف السدیری نے ایک بیان میں کہا کہ ہم حادثے کے بعد کے حالات پر گہری نظر رکھے ہوئے ہیں۔ انہوں نے حادثے میں جاں بحق ہونےوالے شہریوں کے لواحقین اسے ہمدردی اور تعزیت کا اظہار کیا۔