معیاری ازیکٹو پلان اور احتیاطی تدابیر پرعمل کرتے ہوئے حجاج کرام کے سامان کے بیگ بیت اللہ، مشعر منیٰ اور دوسرے مقامات کر پہنچائے جا رہے ہیں۔
العربیہ ٹی وی چینل نے حج کوریج کے دوران کیمرے کی مدد سے حجاج کرام کے سامان کی بسوں کے مناظر بھی کور کیے ہیں۔ ان بسوں کے ذریعے حجاج کرام کے ضروری سامان کے بیگ منیٰ اور بیت اللہ تک پہنچائے جا رہے ہیں۔ تمام بیگوں کی اچھی طرح چھان بین کی جاتی اور ان پر جراثیم کش اسپرے کیا جاتا ہے۔ اس کے بعد انتہائی احتیاطی کےساتھ حجاج کرام کی قیام گاہوں میں پہنچا دیا جاتا ہے۔
سعودی محکمہ ڈاک’سبل‘ نے حج کی ادائی میں معاونت کرنے والے اداروں کی رابطہ کونسل کے ساتھ تعاون سے ’حج بیگ کے بغیر‘ کے عنوان سے ایک مہم شروع کی ہے۔ سعودی عرب کا محکمہ ڈاک حج کے موقعے پر لاجسٹک سروسز فراہم کررہا ہے تاکہ حجاج کرام اپنے سامان کی پریشانی سے بے نیاز ہوکرفریضہ حج کی ادائی پرتوجہ دیں اوران کا سامان محکمہ ڈاک کے ذریعے ان کی قیام گاہوں تک پہنچتا رہے۔
اس سروس کے ذریعے حجاج کرام کےسامان کے لیے کارگو سروس، مشاعر مقدسہ میں ان کے سامان کی رسائی، حج کی تکمیل کے بعد ڈاک کے ذریعے تمام حجاج کرام کا سامان ان کے گھروں تک پہنچانا شامل ہے۔ یہ سروس ملک بھرمیں موجود ڈاک کی برانچوں کی مدد سے فراہم کی جائے گی۔
