.

مکہ مکرمہ کے تمام پارکوں میں مفت انٹرنیٹ کی سہولت

پہلی اشاعت: آخری اپ ڈیٹ:

مکہ مکرمہ سیکریٹریٹ نے مکہ ریجن میں واقع تمام عوامی پارکوں میں مفت انٹرنیٹ کی سہولت فراہم کرنے کا اعلان کیا ہے۔

ٹوئیٹر پر سکریٹریٹ کے اکاؤنٹ سے جاری ٹوئیٹ میں کہا گیا ہے کہ میونسپلٹی عوامی پارکوں میں مفت انٹرنیٹ شروع کر رہی ہے۔ ایک دوسرے ٹوئیٹ میں مزید کہا گیا ہے کہ انٹرنیٹ سروس پارکوں کے شائقین کے لیے کشش کا باعث اور راحت وتفریح کا ذریعہ بنے گی۔ مزید برآں وقت سے استفادے، سوشل نیٹ ورکس پر دوستوں کے ساتھ رابطے اور دیگر مختلف امور سرانجام دینے کا بھی موقع ملے گا۔

اس حوالے سے میونسپلٹی میں انفارمیشن ٹکنالوجی کے نائب سیکریٹری ڈاکٹر ابراہیم بن سلمان عبداللہ کا کہنا ہے کہ الیکٹرونک سروسز کی توسیع اور Smart Cities کے لیے منصوبوں اور حکمت عملی کی سپورٹ کی جانب یہ اپنی نوعیت کا منفرد اقدام ہے جس کی مثال پہلے نہیں ملتی۔ ساتھ ہی انہوں نے باور کرایا کہ یہ اقدام مقدس شہر (مکہ مکرمہ) کے سکریٹریٹ کے سربراہ ڈاکٹر اسامہ بن فضل البار کی خواہش پر کیا گیا ہے تاکہ شہریوں اور مقیمین کو بہترین خدمات پیش کی جا سکیں۔

اس سلسلے میں آپریٹنگ سسٹمز اینڈ نیٹ ورک مینجمنٹ کے ڈائریکٹر انجینئر فہد بن فیصل کتوعہ نے بتایا کہ الحسینیہ پارک کو فائبر آپٹکس کے ذریعے مفت انٹرنیٹ سروس فراہم کر دی گئی ہے۔ اعلی کوالٹی کے وائرلیس سگنل ڈسٹریبیوٹر کے ساتھ یہاں انٹرنیٹ کی رفتار 8 میگا بائٹ فی سیکنڈ ہو گی۔ انہوں نے مزید بتایا کہ منصوبے کے تحت آنے والے دنوں میں مکہ مکرمہ میں متعدد پارکوں اور بعض دیگر تفریحی مقامات کو اس سہولت سے آراستہ کر دیا جائے گا۔