.

سعودی عرب: العُلا میں قاع الحاج کا علاقہ ماضی میں حجاج کے قافلوں کی اہم گزر گاہ

پہلی اشاعت: آخری اپ ڈیٹ:

سعودی عرب کے علاقے العُلا میں صحرائی ریت پر فرشی نشست رکھنے والے شیخ مقرن الحریری نے العربیہ نیوز کی نامہ نگار نادین خماش کو ماضی میں اس تاریخی علاقے سے گزرنے والے حج کے قافلوں کے بارے میں بتایا۔

شیخ الحریری کے مطابق "قاع الحاج" جزیرہ عرب میں قدیم دور میں حجاج کے قافلوں کے گزرنے کا ایک مشہور ترین راستہ رہا ہے۔ قاع الحاج سعودی عرب کے ضلع العُلا کے مشرق میں واقع ایک گاؤں ہے۔ اس سے 25 کلو میٹر دوری پر واقع اراضی نے ماضی میں حجاج کے قافلوں کو دیکھا۔ ملکِ شام سے آنے والے یہ قافلے تبوک اور قاع الحاج سے گزرتے ہوئے مکہ مکرمہ پہنچتے تھے۔

اہم تزویراتی محلِ وقوع کے علاوہ قدرت نے اس علاقے کو سحر انگیز پہاڑی مناظر اور ماحول سے بھی نوازا ہے۔ اس کے نتیجے میں یہ جگہ سیاحوں کے لیے ایک پر کشش مقام کی حیثیت رکھتا ہے۔ گویا کہ یہ ایسا فن پارہ معلوم ہوتا ہے جس کو سنہری ریت نے چار چاند لگا دیے ہوں۔

شیخ مقرن کے مطابق قاع الحاج کے قبائل حاجیوں کے قافلوں کو تحفظ فراہم کرنے کی ذمے داری انجام دیا کرتے تھے۔ قافلے کے افراد اونٹوں پر سوار ہوتے تھے۔