باپ کے لیے مسیحا بننے والی بیٹی سے ملیے!

سعودی عرب میں کرونا کی وبا پرقابو پانے کے لیے ایک سے زاید کمپنیوں کی 'کرونا ویکسین' لگانے کا عمل جاری ہے۔ بعض شہریوں کو کرونا کی دوسری خوراک بھی دے دی گئی ہے۔

سعودی عرب کے ایک شہری ترکی العتیبی نے بتایا کہ کرونا کی ویکسین کی دوسری خوراک انہیں ان بیٹی 'دانا' نے لگائی۔ رضا کار نرس کے طور پر خدمات انجام دینے والی دانا العتیبی نے انتہائی محبت سے والد کو کرونا ویکسین کا دوسرا شارٹ لگانے کے بعد پیار سے ان کے سر پر بوسہ دیا تو بقول والد اس کی تاثیر انہیں اپنی روح میں محسوس ہوئی، جس پر وہ اللہ کا احسان مند ہیں۔

العربیہ ڈاٹ نیٹ سے بات کرتے ہوئے ترکی العتیبی نے بتایا کہ ویکسین کی پہلی اور دوسری خوراک لینے کا عمل انتہائی شاندار اور بے مثال تھا۔ انہوں‌ نے بتایا کہ ان کی بیٹی دانا الریاض میں ایک ڈینیٹل کلینک پر ایک رضا کار نرس کے طور پر کام کرتی ہے۔ اس نے کچھ عرصے سے شہریوں کو کرونا ویکسین دینے کی رضا کارانہ خدمات انجام دینا شروع کیا ہے۔ اسے فخر ہے کہ اس کی بیٹی شہریوں میں کرونا کی ویکسین پہنچا کر ان کی جانیں بچانے اور وبا کو شکست دینے میں پیش پیش ہے۔

ترکی العتیبی نے مملکت میں شہریوں اور مقیم افراد کو کرونا کی ویکسین کی بروقت فراہمی پر حکومت کا شکریہ ادا کیا اور کہا کہ سعودی عرب کرونا ویکسین لگانے والے اولین ممالک میں شامل ہے جس سے حکومت کی عوام کی خدمت کے جذبے اور ان کی جانوں کے تحفظ کے عزم کا زندہ ثبوت ہے۔