سعودی عرب کی حکومت نے زائرین، معتمرین اور نمازیوں کو فوری طبی امداد فراہم کرنے کے لیے حرم مکی میں 'ایمرجنسی سینٹر' قائم کیا ہے۔ مسجد حرام میں ہنگامی طبی مرکز کے قیام کے بعد حرم مکی میں موجود تمام زائرین کو چوبیس گھنٹے طبی سہولت میسر ہوگی۔
ایمرجنسی میڈیکل فرسٹ ایڈ سینٹر میں زائرین اور نمازیوں کے لیے جدید ترین طبی سہولیات اور آلات مہیے کیے جائیں گے۔ اس کے ساتھ ساتھ میڈیکل ایمرجنسی سینٹر میں بیت اللہ میں آنے والے اللہ کے مہمانوں کے لیے چوبیس گھنٹے تربیت یافتہ طبی عملہ تعینات رہے گا جو حرم مکی میں کہیں بھی پیش آنے والے واقعے سے نمٹنے کے لیے حرکت میں آئے گا۔
اجیاد ایمرجنسی اسپتال کے ایگزیکٹو ڈائریکٹر اور حرم مکی کے ایمرجنسی میڈیکل سینٹر کے سپر وائزر ڈاکٹر وائل عید نے بتایا کہ ایمرجنسی میڈیکل سینٹربلا تعطل چوبیس گھنٹے، ہفتے کے ساتوں دن اور پورا سال معتمرین، نمازیوں اور زائرین وحجاج کی خدمت جاری رکھے گا۔
