ایک ہی یونیورسٹی سے تعلیم مکمل کرنے والی ’’ہم جماعت‘‘ سعودی ماں ۔ بیٹی سے ملیے!

سعودی عرب کے ضلع ثادق سے تعلق رکھنے والی خاتون اور ان کی بیٹی نے ایک ہی یونیورسٹی سے ایک ساتھ اپنی گریجویشن مکمل کی۔

خاتون کا نام عیدہ الرشیدی اور ان کی بیٹی کا نام اریج ہے۔ دونوں ماں بیٹی شقراء یونیورسٹی میں زیر تعلیم رہیں۔

اریج الرشیدی نے بتایا کہ انٹرمیڈیٹ مکمل کرنے کے بعد اس نے اپنی والدہ کو تجویز پیش کی کہ وہ بھی اریج کے ساتھ شقراء یونیورسٹی سے اپنی تعلیم مکمل کریں۔ اریج کے مطابق اس کی والدہ علم ومعرفت سے محبت کرنے والی ایک پر عزم خاتون ہیں۔ وہ ہمیشہ سے تعلیم کے حصول پر اریج اور اس کے بہن بھائیوں کی حوصلہ افزائی کرتی رہیں۔

عیدہ الرشیدی اور اریج

اریج کی والدہ عیدہ کا یہ بھی کہنا تھا کہ انہوں نے اپنی بیٹی کی تجویز پر آمادہ ہو کر داخلے کا فارم جمع کرا دیا۔ اس پر انہیں ثادق ضلع میں شقراء یونیورسٹی کی شاخ میں داخلہ مل گیا جب کہ اریج کو حریملاء کے علاقے میں واقع شاخ میں داخلہ ملا۔

عیدہ کے مطابق وہ ایک بیوی، ماں، نانی اور یونیورسٹی طالبہ کے طور پر اپنا کردار نبھانے میں کامیاب رہیں۔