’نیوم‘ اور ’کاؤسٹ‘ کا دنیا کا سب سے بڑا مرجانی پارک قائم کرنے کا مشترکہ منصوبہ

نیوم اور کنگ عبداللہ یونیورسٹی آف سائنس اینڈ ٹکنالوجی (کاؤسٹ) نے نیوم شہر میں بحر الاحمر کے کنارے واقع شوشا جزیرے پر دنیا کا سب سے بڑا مرجانی پارک تیار کرنے کا اعلان کیا ہے۔ یہ پارک ایک 100 ہیکٹر رقبے پر محیط ہو گا۔

جزیرہ "شوشا‘‘، جسے ’’جزیرہ مرجانی پارک" بھی کہا جاتا ہے، موسمیاتی تبدیلیوں کے نتائج کی روشنی میں مرجانی چٹانوں کی حفاظت اور بحالی کی کوششوں کا ایک جدید عالمی مرکز بن جائے گا۔ دونوں اداروں نے اس منصوبے کی تکمیل کے لیے 2025ء کا ہدف مقرر کیا ہے۔ اس منصوبے کی تکمیل کے بعد ‘نیوم‘ مرجانی چٹانوں کی بحالی کے شعبے اور عالمی مرجان کی ترقی کے لیے سرکردہ مرکز بن جائے گا۔

سعودی پریس ایجنسی "ایس پی اے" کے مطابق NEOM کے ’سی ای او‘ انجینئر نظمی النصر نے کہا کہ ہم ماحول اور اس کے تمام عناصر ترکیبی کو محفوظ رکھنے کے لیے ایک مربوط نظام کے اندر کام کر رہے ہیں۔ ہم خاص طور پر سمندری راستوں میں مرجان کی چٹانوں کو بچانے کے لیے کوشاں ہیں۔ یہ ماحولیاتی اہداف میں سے ایک ہے جس کے حصول کے لیے ہم مل کر کام کر رہے ہیں۔