امریکا : اسہال کے متعلق طبی ٹویٹ مسخرے پن کا سبب بن گئی

امریکا میں Centers for Disease Control and Prevention (CDC) کی جانب سے لوگوں کو خبردار کیا گیا کہ وہ اسہال میں مبتلا ہونے کی صورت میں تیراکی ہر گز نہ کریں۔ تاہم ایسا نظر آتا ہے کہ مذکورہ مراکز کا یہ اقدام ان ہی کے خلاف چلا گیا ہے۔ مراکز نے اپنے انتباہی بیان کے ساتھ جو تصاویر استعمال کی ہیں ان کی وجہ سے عوامی حلقوں میں بڑا تنازع پیدا ہو گیا ہے۔

اس سلسلے میں سی ڈی سی کی جانب سے کی گئی ٹویٹ میں خبردار کیا گیا ہے کہ اسہال میں مبتلا ہونے کی صورت میں تیراکی کرنا خطرناک ہے۔ ٹویٹ میں مزید کہا گیا ہے کہ "اسہال سے متاثرہ شخص پورے سوئمنگ پول کو آلودہ کر سکتا ہے"۔ اس ٹویٹ کے ساتھ منسلک متحرک تصویر میں ایک لڑکی کو پھسلتے ہوئے سوئمنگ پول میں جاتے ہوئے دکھایا گیا ہے جب کہ اس کی پشت پر کتھئی رنگ کی لکیر ظاہر ہو رہی ہے۔

ٹویٹ میں اس طرح کی صورت حال میں واجب العمل ضروری ہدایات بھی بتائی گئی ہیں۔ البتہ اس متحرک تصویر میں رنگوں کے استعمال کو ہر خاص و عام کی جانب سے مذاق کا نشانہ بنایا جا رہا ہے۔