.

'الکشافہ' حجاج کرام کی خدمت میں پیش پیش رضاکار سپاہی!

پہلی اشاعت: آخری اپ ڈیٹ:

حجاج کرام کی خدمت پرمامور رضاکار اداروں اور تنظیموں میں 'الکشافہ السعودیہ' بھی ہے جس کے ہزاروں رضاکار خندہ پیشانی کے ساتھ اللہ کے مہمانوں کی خدمت میں جُتے ہوئے ہیں۔

میدان عرفات میں نو ذی الحج کو جب لاکھوں حجاج کرام رکن اعظم کی ادائی کے لیے جمع تھے تو اچانک باران رحمت کا نزول شروع ہوگیا۔ اس دوران الکشافہ کے سیکڑوں کارکنوں کو بھی حجاج کی خدمت میں پیش پیش دیکھا گیا۔ کوئی رضاکار وہیل چیئرپرموجود حجاج کرام کی مدد کررہا ہے تو کوئی انہیں حج کے اگلے مراحلے کے بارے میں رہ نمائی بہم پہنچا رہا ہے۔ خیر اور بھلائی کے جذبے سے سرشار ان رضاکاروں کی مسلسل دوڑ دھوپ سے ان کے چہروں پر تھکن کا احساس ہے اور نہ بار بار کے استفسارات پران کے ماتھے پر کوئی شکن پڑتی ہے۔

الکشافہ کے رضاکار یوم عرفہ کی نماز فجر کے ساتھ ہی حجاج کرام کی خدمت پرمامور ہوجاتے ہیں اور اس کے بعد پورا پورا دن حجاج کرام کےساتھ رہتے اوران کی رہ نمائی کے ساتھ ان کی ہرممکن مدد کرتے ہیں۔

کل ہفتےکے روز میدان عرفات میں جمع ہونے والے حجاج کرام پر اچانک بارش شروع ہوگئی تو الکشافہ کےکارکن حجاج کی روحانی اور ایمانی کیفیات کو برقرار رکھنے کے لیے ان میں گھل مل گئے۔ انہیں پانی پلاتے، سڑکوں پرجمع ہونے والا کوڑا کرکٹ صاف کرتے،حجاج کرام کی رہ نمائی کرتے،ان کی وہیل چیئرچلاتے اور دیگر امور میں ان کی مدد کرنے میں پیش پیش رہے۔

الکشافہ کے رضاکاروں کی طرف سے میدان عرفات میں 7 گائیڈنس مرکاز قائم کیے گئے تھے۔ ان میں ایک مرکز ان بچوں کے لیے قائم کیا گیا تھا جو حجاج کےساتھ آنے والے بچوں کے لیےمختص تھا۔ حج کے دوران اپنے والدین سے الگ ہونے والے بچوں کوان کے والدین سے ملانے کے لیے الکشافہ کے رضاکار پیش پیش رہے۔