.
حج وعمرہ

سعودی ہلال احمرکاحج مشن؛عازمین کوہنگامی طبّی امدادمہیا کرنے کے لیے رضاکارٹیمیں تعینات

پہلی اشاعت: آخری اپ ڈیٹ:

سعودی عرب کی ہلال احمر اتھارٹی نے ایام حج کے دوران میں عازمین کے تحفظِ صحت کے لیے اپنے مشن کاآغاز کردیا ہے اور اس نے مسجدِ حرام اور مشاعر مقدسہ میں اپنی طبی ٹیمیں تعینات کردی ہیں۔ اتھارٹی کے طبی رضاکار عازمین حج کو ہنگامی صورت حال میں فوری طبی امداد مہیا کرنے کے لیے ہمہ وقت دستیاب ہوں گے۔

ہلال احمر اتھارٹی نے مکہ مکرمہ ،عرفات اور مزدلفہ میں اپنے تین سو سے زیادہ مردوخواتین رضاکار تعینات کیے ہیں،ان رضاکاروں پر مشتمل ٹیموں کو 2000 سے زیادہ طبی آلات اور اشیاء مہیا کی گئی ہیں۔اس کے علاوہ ہلال احمر کی طبی آلات وسامان سے لیس 30 ایمبولینس گاڑیاں بھی امدادی ٹیموں کی معاونت کے لیے دستیاب ہوں گی۔

اتھارٹی نے 25 پیرامیڈیک پوائنٹس قائم کیے ہیں اور وہاں آکسیجن کے 30 بیگ مہیا کیے ہیں۔

سعودی حکومت نے اس مرتبہ بھی کرونا وائرس کی وبا کے پیش نظر صرف مملکت میں مقیم اپنےشہریوں اورتارکِ وطن مکینوں کوحج کی اجازت دی ہے اور ان میں سے طے شدہ معیارپر پورااترنے والے 60 ہزار خوش نصیبوں کا انتخاب کیا گیا ہے۔ان کا تعلق دنیا کے مختلف ملکوں سے ہے۔انھوں نے ہفتے کے روز مکہ مکرمہ میں پہنچنے کے بعد کعبۃ اللہ کا طواف کیا ہے۔

سعودی وزارت داخلہ نے حج کے ایام کے دوران میں 17 سے 22جولائی تک کووِڈ-19 کی وبا کو پھیلنے سے روکنے کے لیے ’المسجدالحرام، اس کے اطراف کے مقامات اور مشاعرمقدسہ (منیٰ ، مزدلفہ اور عرفات)میں کسی بھی غیرمجاز شخص کے داخلے پر پابندی عاید کررکھی ہے اور جو کوئی بھی ان مقدس مقامات میں غیرمجازداخل ہونے کی کوشش کرے گا،اس پر بھاری جرمانہ عاید کیا جائے گا۔

سعودی وزارت داخلہ نے ایام حج میں المسجدالحرام،اس کےآس پاس کے مقامات اور مشاعرمقدسہ (منیٰ، مزدلفہ اورعرفات) میں جانے کے لیے منتخب عازمین حج کو اجازت نامے جاری کیے ہیں۔

اس نے غیرمجاز افراد پر5 جولائی 2021 ( 25 ذی قعدہ 1442ھ) سے 23 جولائی ( 13 ذی الحجہ 1442ھ) تک مقامات حج میں داخل ہونے پر پابندی عاید کررکھی ہے۔اس کی خلاف ورزی کے مرتکبین پر دس ہزار ریال جرمانہ عاید کیا جائے گا۔وزارت داخلہ نے تمام سعودی شہریوں اور مقیم غیرملکیوں کو ہدایت کی ہے کہ وہ حج موسم سے متعلق سرکاری ہدایات کی پاسداری کریں‘۔

ان پابندیوں پرعمل درآمد کو یقینی بنانے کے لیے سیکیورٹی اہلکار مسجد الحرام، منیٰ، مزدلفہ اورعرفات جانے والے تمام راستوں اورگذرگاہوں پر کڑی نظر رکھ رہے ہیں۔اجازت نامے کے بغیران مقامات کی جانب آنے والے افراد کو بھاری جرمانے عاید کیے جارہے ہیں۔