.

9 زبانیں، 13 ملین منشورات اور 45 چینلز حاجیوں کی رہنمائی پر مامور

سماجی رابطوں کی ویب سائٹس پر چار زبانوں میں معلومات

پہلی اشاعت: آخری اپ ڈیٹ:
سعودی عرب کے محکمہ شہری دفاع نے امسال حج کے لئے نو [9] زبانوں میں حجاج کرام کے لئے رہنمائی کا مواد تیار کیا ہے۔ آڈیو، ویڈیو اور تحریری مواد حاجیوں کا تعلیمی پس منظر اورعمر کا خیال رکھتے ہوئے تیار کیا گیا۔

شہری دفاع کے میڈیا ترجمان کیپٹن عبداللہ العرابی نے روزنامہ 'عکاظ' کو بتایا کہ رہنما مواد کی تیاری میں اس بات کا خصوصی خیال رکھا گیا ہے کہ اس سے استفادہ کرنے والے 'اللہ کے مہمان' کون سا ذریعہ سفر اختیار کرتے ہوئے اس گھر کی زیارت کو آ رہے ہیں۔ بحری، بری اور فضائی سفر اختیار کرنے والوں کے لئے رہنما مواد ان کے متعلقہ ذریعہ سفر کو سامنے رکھ کر تیار کیا گیا ہے۔

کیپٹن عبداللہ العرابی کا کہنا تھا کہ ہم نے سماجی رابطوں کی ویب سائٹس پر چار زبانوں [اردو، انگریزی، فرانسیسی اور عربی] میں رہنمائے حجاج تیار کئے ہیں۔ نو [9] زبانوں میں 13 ملین اور 700 ہزار کتابچے تیار کرائے ہیں۔ اس کے لئے مختلف زبانوں اور مندرجات پر مشتمل خصوصی پیغامات بھی بڑی تعداد میں زیور طبع سے آراستہ کئے گئے ہیں۔

چھپن عرب اور بین الاقوامی اخبارات کے ذریعے حاجیوں کو روزمرہ معلومات کی فراہمی یقینی بنائی جا رہی ہے۔ نیز 45 سیٹلائیٹ ٹی وی چینلز چار زبانوں میں معلوماتی پروگرام نشر کر رہے ہیں۔