.

شاہ عبداللہ کا مملکت کے اتحاد وخود مختاری کے خلاف بغاوتوں پر انتباہ

قوم کے دشمن فائدہ اٹھانے کی کوشش میں ہیں

پہلی اشاعت: آخری اپ ڈیٹ:
سعودی عرب کے فرمانروا شاہ عبداللہ بن عبدالعزیز نے مملکت کی خودمختاری کے لیے خطرے کا موجب بننے والی ''بغاوتوں'' اور قوم کے دشمنوں کے خطرات سے خبردار کیا ہے۔

انھوں نے عید الاضحیٰ کے موقع پر اپنے پیغام میں قوم کے دشمنوں کے بارے میں انتباہ کرتے ہوئے کہا ہے کہ وہ ملک کے اتحاد اور سلامتی کونقصان پہنچانے کے درپے ہیں اور وہ ہر موقع سے فائدہ اٹھانے کی کوشش کرتے ہیں۔

خادم الحرمین الشریفین نے کہا کہ ''امت کے دشمن ہمارے ملک کی سلامتی اور اتحاد کو نقصان پہنچانا چاہتے ہیں۔ اس ملک کا اتحاد شاہ عبدالعزیزمرحوم اور آپ کے آباء واجداد نے قائم کیا تھا''۔

سعوی پریس ایجنسی کے مطابق شاہ عبداللہ نے یہ پیغام مکہ معظمہ میں عیدالاضحیٰ کے موقع پر منعقدہ تقریب میں دیا ہے۔اس تقریب میں سعودی شہزادے ،مفتیٔ اعظم ،علماء ،شیوخ ،خلیج تعاون کونسل کے مہمان ،وزراء اور حج کے لیے آنے والے بیرون ملک کے وفود کے سربراہان شامل تھے۔

انھوں نے اپنے پیغام میں کہا کہ ''ہمیں بغاوتوں اور افتراق نے گھیر رکھا ہے لیکن انھیں اللہ پر یقین سے شکست دی جاسکتی ہے اور جوکوئی بھی ہماری سلامتی ،اتحاد اور خودمختاری کو نقصان پہنچانے کی کوشش کرے،ہم اس کے مقابلے میں اٹھ کھڑے ہوں۔اس لیے ہمیں اپنی ذمے داریوں کو نبھانا ہوگا''۔