.

مصر سیناء کے علاقے میں مسلح افراد کی فائرنگ، 3 پولیس اہلکار ہلاک

سیکیورٹی اداروں کو جہادی گروپوں پر شبہ

پہلی اشاعت: آخری اپ ڈیٹ:
مصری شہر سیناء میں جمعہ کی شب پولیس وین پر مسلح حملے میں تین پولیس اہلکار ہلاک اور ایک زخمی ہو گئے۔ العربیہ ٹی وی کی رپورٹ کے مطابق پولیس وین حملے کے وقت ویلی برج کی سمت جا رہی تھی۔

سیکیورٹی ذرائع کا کہنا ہے دو مسلح افراد، جن کا تعلق غالباً جہادی گروپ سے تھا، نے پولیس کی گاڑی میں سوار پولیس اہلکاروں پر فائرنگ کی۔ اپنے ہدف کو نشانہ بنانے کے بعد مسلح افراد موقع سے فرار ہو گئے۔

مصر کے سرکاری ٹی وی نے حملے میں فوری طور پر تین پولیس اہلکاروں کے ہلاک ہونے کی تصدیق کی ہے۔ رپورٹ کے مطابق یہ اہلکار علاقے میں روٹین گشت پر تھے کہ جب ان پر فائرنگ کی گئی، فائرنگ سے پولیس اہلکاروں کے زخمی ہونے کی بھی اطلاعات ہیںم جنہیں العریش کے ہسپتال منتقل کر دیا گیا ہے۔

ادھر شمالی سیناء گورنری کے مرکزی شہر القسیمۃ میں کیش لیجانے والی گاڑی پر حملہ کیا گیا۔ حملہ آور گاڑی سے 80 ہزار مصری پونڈ لوٹ کر فرار ہو گئے۔

یاد رہے کہ پولیس کی فائرنگ سے علاقے کے ایک بدو کی ہلاکت کے بعد سے العریش اور شمالی گورنری سیناء کے علاقے میں حالات کشیدہ چلے آ رہے ہیں جبکہ مصری فوج انتہا پسند مسلح افراد کی گرفتاری کے لئے علاقے میں آپریشن کر رہی ہے۔