.

دبئی کار شو روم کا افتتاح، امریکی اداکارہ کو ڈھائی لاکھ ڈالرز کی سلامی

فضول خرچی کی انتہا

پہلی اشاعت: آخری اپ ڈیٹ:
تیل کی دولت سے مالا مال عرب شیوخ کی شہ خرچیوں اور عیاشیوں کی خبریں تو آئے دن منظر عام پر آتی رہتی ہیں لیکن اب ان کے دیس میں کاروبار کرنے والے افراد اور ادارے بھی ان سے کسی طرح پیچھے نہیں رہے اور دبئی میں کھلنے والے ایک مہنگے کار شو روم کے مالکان نے اس کے افتتاح کے لیے امریکی اداکارہ اور گلوکارہ جینیفر لوپز پر دس لاکھ درہم (ڈھائی لاکھ ڈالرز) لُٹا دیے ہیں۔

عربین بزنس آن لائن کی رپورٹ کے مطابق امریکی گلوکارہ اکیس نومبر کو دبئی پہنچی تھیں اور انھوں نے جرمن کار ساز فرم آڈی کے نئے شو روم النبودہ آٹو موبائلز کے باضابطہ افتتاح کی تقریب میں شرکت کی ہے۔

امریکی گلوکارہ جمعرات کو دبئی میڈیا سٹی میں ایک کنسرٹ میں شرکت کرنے والی تھیں اور اس شو کو آڈی مڈل ایسٹ نے اسپانسر کیا ہے۔ جینیفر کو مبینہ طور پر شو روم کی افتتاحی تقریب میں مہمان خصوصی کے طور پر شرکت کرنے پر ڈھائی لاکھ امریکی ڈالرز ادا کیے گئے ہیں۔

اس اداکارہ اور گلوکارہ نے آڈی شوروم کی تقریب میں موجود اپنے مداحوں سے گفتگو کرتے ہوئے کہا کہ ''یہ پہلا موقع ہے، میں یہاں آئی ہوں اور میں بہت خوش ہوں۔ میں نے یہاں بہت اچھا دن گزارا ہے۔ یہاں کا موسم بہت اچھا ہے۔ آپ لوگ بہت خوش قسمت ہیں''۔

آڈی مڈل ایسٹ نے عربین بزنس آن لائن کو بھیجے گئے ایک بیان میں جینفر لوپز کے دبئی میں شو کو اسپانسر کرنے کی تصدیق کی ہے لیکن یہ بتانے سے گریز کیا ہے کہ انھیں شو روم کے افتتاح کے لیے کتنی رقم ادا کی گئی ہے۔

آڈی کا شو روم دبئی میں شاہراہ شیخ زاید پر کھولا گیا ہے۔ اس کی کل مالیت گیارہ کروڑ اسی لاکھ درہم بتائی گئی ہے اور یہ دنیا میں اپنی نوعیت کا سب سے بڑا شو روم ہے۔ یہاں فی الوقت آڈی کی ستاون گاڑیاں نمائش کے لیے پیش کی گئی ہیں۔ اس کو عوام کے لیے باقاعدہ طور پر تین دسمبر کو کھول دیا جائے گا۔