.

صنعا میں سعودی سفارت کار یمنی محافظ سمیت قتل

مسلح افراد کی معاون فوجی اتاشی کی کار پر فائرنگ

پہلی اشاعت: آخری اپ ڈیٹ:
یمن کے دارالحکومت صنعامیں مسلح حملہ آوروں نے سعودی عرب کے سفارت کار خالد العنزی اور ان کے یمنی محافظ کو فائرنگ کر کے قتل کر دیا ہے۔

صنعا میں العربیہ کے نمائندے نے یمنی حکام کے حوالے سے اطلاع دی ہے کہ''مسلح افراد نے صنعا کے جنوبی علاقے میں سعودی سفارت کار کی کار پر فائرنگ کی ہے۔ حملے میں وہ اور ان کا یمنی محافظ مارے گئے ہیں''۔ مقتول سفارت کار سعودی سفارت خانے میں معاون فوجی اتاشی تعینات تھے۔

یمنی حکام نے اپنی شناخت ظاہر نہ کرنے کی شرط پر بتایا ہے کہ مسلح افراد نے فوجی وردیاں پہن رکھی تھیں۔ فوری طور پر اس واقعہ کی مزید تفصیل سامنے نہیں آئی اور نہ کسی گروپ نے اس واقعہ کی ذمے داری قبول کرنے کا دعویٰ کیا ہے۔

ریاض میں سعودی وزارت خارجہ نے ایک بیان میں یمنی دارالحکومت میں اپنے سفارت کار کے قتل کی تصدیق کی ہے اور کہا ہے اس واقعہ کے بارے میں جلد بیان جاری کیا جائے گا۔