.

بشارالاسد بحران کے حل کے لیے تیار نہیں: جان کیری

شامی صدر نے جنگی جرائم کا ارتکاب کیا ہے:'العربیہ' سے خصوصی انٹرویو

پہلی اشاعت: آخری اپ ڈیٹ:

امریکی وزیر خارجہ جان کیری کا کہنا ہے کہ شامی صدر بشارالاسد جنگی جرائم کے مرتکب ہو رہے ہیں اور وہ ملک میں جاری بحران کے حل کے لیے بالکل بھی تیار نہیں ہیں۔

جان کیری نے جمعرات کو 'العربیہ' نیوز چینل کے ساتھ ایک خصوصی انٹرویو میں کہا کہ ''بشار الاسد خطے میں دہشت گردوں کے لیے ''مقناطیس'' بن چکے ہیں''۔انھوں نے اس بات کی تردید کی ہے کہ امریکا کا ماضی میں بشارالاسد کے ساتھ شام میں دہشت گردی کے خلاف جنگ میں کوئی رابطہ تھا۔

انھوں نے ایران کے حوالے سے گفتگو کرتے ہوئے کہا کہ ''امریکا نے اس ملک کی شامی تنازعے میں مداخلت کے حوالے سے محتاط روش اختیار کررکھی ہے اور وہ ایران کو اس کے الفاظ نہیں، بلکہ اقدامات سے جانچے گا''۔

واضح رہے کہ شام میں مارچ 2011ء سے صدر بشارالاسد کے خلاف جاری عوامی احتجاجی تحریک اور اس کے بعد خانہ جنگی میں ایک لاکھ تیس ہزار سے زیادہ افراد مارے جا چکے ہیں۔لندن میں قائم شامی آبزرویٹری برائے انسانی حقوق کی اطلاع کے مطابق 2013ء شام میں جاری خانہ جنگی میں سب سے ہلاکت آفرین ثابت ہوا ہے اور اس سال کے دوران لڑائی اور تشدد کے دوسرے واقعات میں قریباً تہتر ہزار افراد مارے گئے ہیں۔