.

حوثی نواز جنرل یمنی فوج کا ڈپٹی چیف مقرر

پہلی اشاعت: آخری اپ ڈیٹ:

یمنی صدر عبد ربہ منصور ھادی نے اہل تشیع مسلک کے شدت پسند حوثیوں کے حمایت یافتہ فوجی جنرل کو ڈپٹی چیف آف آرمی اسٹاف مقرر کیا ہے۔

سرکاری خبر رساں ایجنسی’’سبا‘‘ کے مطابق صدر عبد ربہ منصور ھادی نے اپنے ایک تازہ حکم نامے میں حوثیوں کے حمایت یافتہ بریگیڈیئر جنرل زکریا یحیٰ محمد الشامی کو جنرل کے عہدے پر ترقی دینے کے بعد انہیں مسلح افواج کا ڈپٹی چیف مقرر کیا ہے۔

خیال رہے کہ جنرل الشامی حوثیوں نے 18 مارچ 2013ء سے جنوری 2014ء کے دوران ملک کی سیاسی جماعتوں کے درمیان جاری رہنے والی قومی کانفرنس میں حوثیوں کے مندوب کی حیثیت سے شرکت کی تھی۔

العربیہ ڈاٹ نیٹ کے مطابق جنرل الشامی کے والد بھی فوج کے اعلٰی عہدے پرفائز رہنے کے ساتھ شورش زدہ صوبے صعدہ کے گورنر بھی رہے ہیں۔ صدر عبد ربہ منصور ھادی کی جانب سے یہ تقرری آرمی چیف کی تقرری کے تین ہفتے بعد کی گئی ہے۔

واضح رہے کہ تین ہفتے قبل صدر نے جنرل حسن ناجی ھادی خیران کو مسلح افواج کا سربراہ مقرر کیا تھا۔ حوثیوں نے ھادی خیران کی تقرری مسترد کر دی تھی۔