.

صدر ایردوآن کی توہین پر سابق مِس ترکی سے پوچھ تاچھ

پہلی اشاعت: آخری اپ ڈیٹ:

ترکی کی ایک ماڈل اور سابقہ ملکہ حسن سے استنبول کے ایک پراسیکیوٹر نے صدر رجب طیب ایردوآن کی مبینہ توہین پر مبنی نظم انسٹاگرام پر شئیر کرنے کے الزام میں پوچھ تاچھ کی ہے۔

ایک مقامی خبررساں ایجنسی چیہان کی رپورٹ کے مطابق سابق مِس ترکی مرو بیوک ساراچ نے ترکی کے قومی ترانے کے بعض بول لے کر ان سے ایک نظم بنائی تھی اور اس میں صدر ایردوآن کی براہ راست توہین کی گئی ہے۔مرو بیوک سنہ 2006ء میں مِس ترکی منتخب ہوئی تھیں۔

بیوک ساراچ نے استنبول کی عدالت میں موقف اختیار کیا ہے کہ ان کا صدر ایردوآن کی توہین کا کوئی ارادہ نہیں تھا۔انھوں نے عدالت کے روبرو بیان میں کہا کہ ''میں نے ''چیف کی نظم'' کے عنوان سے ازخود شاعری نہیں گھڑی تھی بلکہ اس کو اپنے اکاؤنٹ پر صرف شئیر کیا تھا کیونکہ یہ مجھے مزاحیہ لگی تھی۔میرا رجب طیب ایردوآن کی توہین کا ہرگز بھی کوئی ارادہ نہیں تھا''۔

اس ماڈل کا کہنا ہے کہ ''مجھے جب خبردار کیا گیا کہ میرے خلاف قانونی چارہ جوئی ہوسکتی ہے تو میں نے انسٹاگرام سے یہ نظم حذف کردی تھی''۔جب پراسیکیوٹر کے ترجمان سے اس معاملے پر بات کرنے کے لیے رابطہ کیا گیا تو انھوں کہا کہ وہ اس کیس پر فی الحال کوئی تبصرہ نہیں کرسکتے۔