.

یمن: القاعدہ کے فوج کے کیمپ پر حملے میں 12 ہلاک

پہلی اشاعت: آخری اپ ڈیٹ:

یمن کے جنوب مشرقی علاقے میں القاعدہ کے مشتبہ جنگجوؤں نے فوج کے ایک کیمپ پر کار بم حملہ کیا ہے اور فائرنگ کی ہے جس کے نتیجے میں دس جنگجو اور دو فوجی ہلاک ہوگئے ہیں۔

یمن کے ایک عسکری ذریعے کے مطابق صوبہ حضر موت کے قصبے بدح میں جنگجوؤں نے سوموار کی صبح فوجی کیمپ کے باہر بارود سے بھری دو کاروں کو دھماکوں سے اڑایا ہے۔ علاقے کے مکینوں کا کہنا ہے کہ انھوں نے دو بم دھماکوں کے بعد فائرنگ کی آوازیں بھی سنی ہیں۔

اس فوجی عہدہ دار کا کہنا ہے کہ ’’ فوجیوں نے حملے کو ناکام بنا دیا ہے اور کیمپ کو محفوظ بنا دیا ہے ۔بعض حملہ آور بھاگ کر نزدیک واقع فارموں میں جا چھپے ہیں اور ان کا اب پیچھا کیا جارہا ہے۔

القاعدہ کے جنگجوؤں نے کچھ ماہ کے وقفے کے بعد یمنی فوج کے کیمپ پر اس طرح کا حملہ کیا ہے۔واضح رہے کہ القاعدہ نے یمن میں 2011ء کے بعد طوائف الملوکی سے فائدہ اٹھایا تھا اور اس کے جنگجوؤں نے ملک کے جنوب مشرق میں واقع بعض شہروں پر قبضہ کر لیا تھا ۔

یمنی صدر عبد ربہ منصور ہادی کی وفادار فوج نے گذشتہ مہینوں کے دوران میں انھیں شہری علاقوں سے نکال باہر کیا ہے اور وہ اب پہاڑوں میں جا چھپے ہیں لیکن وہ وہاں سے وقفے وقفے سے فوج اور سرکاری تنصیبات پر حملے کرتے رہتے ہیں۔