حوثی باغی یمنی بندر گاہوں پر حملوں کے لیے جنگجوؤں کو تربیت دے رہے ہیں: عرب اتحاد

سعودی عرب کی قیادت میں عرب فوجی اتحاد کے ترجمان کرنل ریاض المالکی نے کہا ہے کہ حوثی ملیشیا اپنے جنگجوؤں کو بحری جہازوں کو نشانہ بنانے کے لیے تربیت دے رہی ہے اور الحدیدہ کی بندر گاہ پر امدادی بحری جہازوں اور صنعا ء کے ہوائی اڈے سے اڑنے والے طیاروں پر حملوں کی دھمکیاں دے رہی ہے۔

انھوں نے بدھ کے روز ایک نیوز کانفرنس میں کہا کہ حوثی ملیشیا یمن کی بندرگاہوں کے نزدیک بحری جہازوں کی نقل وحرکت کو مانیٹر کرنے کے لیے راڈار استعمال کررہی ہے اور اس بات کے کافی شواہد موجود ہیں کہ یمن میں غیرملکی ماہرین حوثی جنگجوؤں کی تخریبی کارروائیوں میں معاونت کررہے ہیں۔

کرنل ریاض المالکی نے صحافیوں کو بتایا کہ یمن کی الحدیدہ بندر گاہ پر امدادی سامان سے لدے بحری جہازوں کے داخلے کا سلسلہ جاری ہے اور انھوں نے یمنی بندر گاہوں میں امدادی جہازوں کے داخلے کے لیے 1800 اجازت نامے جاری کردیے ہیں۔