.

پابندیوں کے ڈر سے ایرانی تیل کے خریدار متبادل کی تلاش میں

یورپ کو ایرانی خام تیل کی سپلائی میں 35 فی صد کمی

پہلی اشاعت: آخری اپ ڈیٹ:

ایران پر امریکا کی اقتصادی پابندیوں کے بعد ایرانی خام تیل کی پیدوارا میں کمی آئی ہے۔ ایک رپورٹ کے مطابق رواں سال کے دوران یورپی ممالک کو ایرانی خام تیل کی پیداوار میں 35 فی صد کمی دیکھی گئی۔ دوسری جانب ایران پر عاید کردہ پابندیوں سے بچنے کے لیے ایرانی تیل کے خریدار بھی متبادل تیل پیدا کرنے والے ملکوں کی تلاش میں ہیں۔

العربیہ ڈاٹ نیٹ کے مطابق ایشیا اور یورپ کے ایرانی تیل کے خریدار سعودی عرب، عراق، روس اور بعض دوسرے ممالک کے خام تیل کی خریداری کو ترجیح دینے لگے ہیں۔

خیال رہے کہ ایران کے خلاف امریکی پابندیوں کے نفاذ کا پہلا مرحلہ اگست میں شروع ہوا جس کے نتیجے میں نہ صرف ایرانی تیل بلکہ دیگر مصنوعات کو اور معیشت کو بھی شدید جھٹکا لگا۔ پابندیوں کا دوسرا مرحلہ نومبر میں نافذ ہونے کا امکان ہے۔ دوسرے مرحلے کے بعد خام تیل کے خریدار چین، بھارت، جاپان اور جنوبی کوریا کی طرف متوجہ ہوسکتےہیں۔

رپورٹس کے مطابق رواں سال کے آغاز ہی سے یورپی ممالک کو ایرانی خام تیل کی سپلائی کم ہونا شروع ہوگئی تھی۔ اب تک اس میں 35 فی صد کمی آچکی ہے۔ یورپی ممالک کو یومیہ ایران کے 4 لاکھ 15 ہزار بیرل تیل کی سپلائی ہو رہی ہے جب کہ سعودی عرب اور عراق کے خام تیل کی خریداری میں 30 فی صد اضافہ ہوا ہے۔