.

امریکا اور شمالی کوریا مذاکرات میں مزید تاخیر نہ کریں: یواین چیف

پہلی اشاعت: آخری اپ ڈیٹ:

اقوام متحدہ کے جنرل سیکریٹری انتونیو گوٹیرس نے امریکا اور شمالی کوریا پر مذاکرات جلد از جلد مکمل کرنے پر زور دیا ہے۔ ان کا کہنا ہے کہ شمالی کوریا کو جوہری ہتھیاروں سے پاک کرنے کے سلسلے میں ہونے والے مذاکرات میں مزید تاخیر مناسب نہیں۔

اقوام متحدہ کے سربراہ کی طرف سے یہ بیان ایک ایسے وقت میں سامنے آیا ہے جب گذشتہ روز شمالی کوریا کے اعلیٰ مذاکرات کار نے وائٹ ہائوس میں امریکی صدر ڈونلڈ ٹرمپ کے ساتھ ڈیڑھ گھنٹہ ملاقات کی ہے۔

ایک پریس کانفرنس کے دوران انتونیو گوٹیرس نے کہا کہ اب وقت آگیا ہے کہ امریکا اور شمالی کوریا بیانگ یانگ کو جوہری ہتھیاروں سے پاک کر کے کے سلسلے میں سنجیدہ مذاکرات کریں۔

انہوں‌ نے کہا کہ جزیرہ نما کوریا کو جوہری ہتھیاروں کی تیاری سے روکنے کے لیے امریکا اور شمالی کوریا کے درمیان مذاکرات کامیاب بنانے کی ضمانت فراہم کرنا وقت کی ضرورت ہے۔

گذشتہ روز شمالی کوریا کے مندوب نے وائیٹ ہائوس میں امریکی صدر ڈونلڈ ٹرمپ اور امریکی وزیر خارجہ مائیک پومپیو سے ملاقات کی تھی۔ ان ملاقاتوں کا مقصد شمالی کوریا کے لیڈر کم جونگ ان اور صدر ڈونلڈ ٹرمپ کے درمیان ملاقات کی راہ ہموار کرنا اور شمالی کوریا کے جوہری پروگرام کو رول بیک کرنے کی کوششوں کو آگے بڑھانا ہے۔