محائل عسیر میں کارروائی کے دوران سعودی سیکیورٹی اہلکار شہید

سعودی عرب کے جنوب مغربی علاقے محائل عسیر میں ڈکیتی کی کارروائی میں ماخوذ ایک مفرور ملزم کی گرفتاری کے لیے کیے گئے آپریشن کے دوران ایک سیکیورٹی اہلکار شہید ہوگیا۔

تفصیلات کے مطابق عسیر میں پولیس کے ترجمان نے بتایا کہ سیکیورٹی حکام کو خفیہ ذرائع سےاطلاع ملی تھی کہ علاقے میں گن پوائنٹ پر ڈکیتی میں ملوث ایک ملزم روپوش ہے۔ ملزم کے ٹھکانے کی نشاندہی کے بعد اس خلاف کارروائی شروع کی گئی۔

ملزم نے مزاحمت کی اور دستی ہتھیاروں سے حملہ کر دیا جس کے نتیجے میں ایک پولیس اہلکار شدید زخمی ہوگیا۔ اسے اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گیا۔ پولیس اہلکاروں نے ملزم کا گھیرائو کرکے اسے گرفتار کرلیا ہے۔ ملزم کے خلاف سخت قانونی کارروائی شروع کردی گئی ہے۔