سعودی عرب میں گھوڑوں کی عالمی دوڑ ہفتے کے روز ہو رہی ہے۔ مملکت کے جوکی کلب کی جانب سے "سعودی کپ ڈے" کا انعقاد دارالحکومت الریاض کے کنگ عبدالعزیز ریس کورس میں ہو گا۔
سعودی فرماں روا شاہ سلمان بن عبدالعزیز اور ولی عہد شہزادہ محمد بن سلمان کی سرپرستی میں ہونے والے اس مقابلے کی مجموعی انعامی رقم دو کروڑ 92 لاکھ ڈالر ہے۔
سعودی جوکی کلب کے چیئرمین شہزادہ بندر بن خالد الفیصل نے ایک پریس کانفرنس میں بتایا ہے کہ یہ مملکت میں اس اعلیٰ سطح پر ہونے والی پہلی دوڑ ہے۔ اس مقابلے میں دنیا بھر سے بہترین گھوڑے، تربیت کار اور گھڑ سوار شریک ہوں گے۔ شہزادہ بندر کے مطابق مقابلے کی مقرر کردہ انعامی رقم دنیا میں اس نوعیت کی دوڑوں کے عالمی سطح پر منعقد ہونے والے مقابلوں میں سب سے زیادہ رقم ہے۔
سعودی جوکی کلب کے چیئرمین نے بتایا کہ کنگ عبدالعزیز ریس کورس کئی برسوں سے متعدد اہم مقابلوں اور ایونٹس کی میزبانی کر رہا ہے۔
