شاہ سلمان کا چینی صدر کو فون، کروناوائرس سے نمٹنے کے لیے بھرپورمدد وحمایت کی یقین دہانی
سعودی عرب کے شاہ سلمان بن عبدالعزیز نے چینی صدر شی جین پنگ سے ٹیلی فون پر بات چیت کی ہے اور انھیں مملکت کی جانب سے چین کو مہلک کرونا وائرس پر قابو پانے کی جنگ میں مکمل مدد وحمایت کی یقین دہانی کرائی ہے۔
خادم الحرمین الشریفین نے شاہ سلمان مرکز برائے ریلیف اور انسانی امداد کو اس نئے کرونا وائرس پر قابو پانے کے لیے چین کو ہر ممکن امداد مہیا کرنے کی ہدایت کی ہے۔
شاہ سلمان نے چینی صدر سے گفتگو کرتے ہوئے اس مہلک وائرس کا شکار ہوکر جان کی بازی ہارنے والے افراد کے خاندانوں سے تعزیت کا اظہار کیا ہے اور اس وائرس سے متاثرہ زیرعلاج افراد کی جلد صحت یابی کی دعا کی ہے۔
چینی صدر نے جواب میں شاہ سلمان کی جانب سے کرونا وائرس سے نمٹنے کے لیے امداد کی پیش کش اور مضبوط حمایت کو سراہا ہے۔
عالمی ادارہ صحت ( ڈبلیو ایچ او) نے فلوطرز کے اس مہلک وائرس کو صحت کی عالمی ایمرجنسی قراردے دیا ہے۔ماہرین کا کہنا ہے کہ اس وائرس کی نوعیت اور پھیلنے کے بارے میں ابھی بہت کچھ نامعلوم ہے،ابھی تک یہ پتا نہیں چل سکا ہے کہ یہ وائرس کیسے ایک انسان سے دوسرے انسان میں منتقل ہوتا ہے اور یہ کس حد تک مہلک ہے۔
