چین میں کرونا وائرس سے سب سے متاثرہ شہر ووہان سے دو فروری کو سعودی عرب واپس لائے گئے دس طلبہ کو آج اتوار کو الریاض میں واقع ایک صحت مرکز سے ان کے آبائی گھروں کو جانے کی اجازت دی جارہی ہے۔
العربیہ کے نمایندے نے سعودی عرب کے طبی ذرائع کے حوالے سےبتایا ہے کہ یہ طلبہ کرونا وائرس سے متاثر نہیں ہوئے ہیں اور انھیں چودہ روز تک الگ تھلگ رکھنے کا وقت پورا ہوگیا ہے۔
کرونا وائرس سے متاثرہ افراد کے لیے الریاض میں قائم کردہ اس صحت مرکز میں صرف ان سعودی طلبہ ہی کو رکھا گیا تھا اور ابھی اس کو عوام کے لیے نہیں کھولا گیا ہے۔
ان طلبہ کو کڑی طبی نگرانی میں رکھا گیا ہے۔ان کے دن میں دو مرتبہ بخار ، کھانسی اور نزلہ ،زکام کی علامات کے ٹیسٹ کیے جاتے تھے اور ہر تین روز کے بعد ان کے لعاب دہن کا ٹیسٹ کیا جاتا تھا تاکہ اس بات کو یقینی بنایا جاسکے کہ وہ کرونا وائرس سے کسی بھی متاثر نہیں ہوئے ہیں اوراس مرض سے بالکل پاک ہیں۔
