روس کے ایک فوجی افسر اپنی محبوبہ کو شادی کا پیغام دینے کے لیے ایک ایسا طریقہ اختیار کیا جسے دیکھ کر سب حیران رہ گئے۔
العربیہ ڈاٹ نیٹ کے مطابق روسی فوجی افسر نے اپنی محبوبہ کو شادی کا پیغام دینے اور اس کے ساتھ اظہار محبت کے اعلان کے لیے ایک برفانی علاقے کا انتخاب کیا جہاں وہ ٹینکوں کی گھن گرج میں جا پہنچا۔ اس نے ٹینکوں کو اس طرح کھڑا کیا کہ ان سب نے مل کر دل کی تصویر بنا لی۔ اس کے درمیان کھڑے ہو کر روسی فوجی نے اپنی محبوبہ کو پھول پیش کیے اور شادی کے لیے پروپوز کیا۔
روسی وزارت دفاع کی طرف سے ٹی وی چینلوںکو جاری ایک ویڈیو میں دیکھا جاسکتا ہے کہ 'ٹی ۔72۔ بی 3' ماڈل کے 16 ٹینک ماسکو کے قریب 'الابینو فوجی اڈے' پر جمع ہوئے۔ اس کے بعد جو کچھ دیکھا گیا وہ حیران کن تھا۔
اس موقعے پر ڈینس کازانٹریو نے اپنی محبوبہ الیکذنڈرا کوبیٹووا کو ٹینکوں کے بیچ پہنچایا اور اس کی آنکھوں میں پٹی باندھی گئی تھی۔ اسے ٹینکوں کے جھرمٹ کے بیچ لا کھڑا کیا گیا۔ اس کی آنکھوں سے پٹی ہٹائی گئی تو وہ ہکا بکا رہ گئی۔ یہ مناظر 'زفیزڈا' ٹی وی چینل پر نشر کیے گئے۔ الیکذنڈرا کو ٹینکوںکے بیچ لانے کے بعد اس کی آنکھوں سے پٹی ہٹائی گئی تو فوجی افسر نے اس کے سامنے جھک کر اس کا ہاتھ تھاما اور سرخ پھول پیش کیے۔
اس کے بعد روسی فوجی افسر دوسرے فوجیوں سے مخاطب ہوئے اور کہا کہ ہم ایک عرصے سے ایک ساتھ ہیں۔ ہم نے بہت سی مشکلات برداشت کی ہیں اور ہم نے ایک بڑی مسافت طے کی ہے۔ ہمارے درمیان فاصلے مٹ گئے ہیں اور میں آج اپنی محبوبہ کو شادی کے لیے پروپوز کر رہا ہوں۔ اس پر اس کی محبوبہ نے ہاں میں سر ہلایا۔ اس کے بعد منگنی کی انگوٹھی پہنی۔ فوجی چینل سے بات کرتے ہوئے اس نے کہا کہ میں نہیں جانتی کہ اب تک کیا کچھ ہوا ہے مگر میرے لیے یہ سب کچھ غیر متوقع ہے۔ ٹی وی چینل کے نامہ نگار کے مطابق آج تک ایسا نہیں ہوا کہ کسی فوجی افسر نے اپنی محبوبہ کو شادی کے لیے اس طرح پروپوز کیا ہو۔
