سعودی عرب میں پبلک ٹرانسپورٹ اور اندرون ملک فضائی سروس 14 روز کے لیے بند

سعودی عرب کی حکومت نے کرونا وائرس کے انسداد کے حفاظتی انتظامات کے تحت اندرون ملک 14 دن کے لیے ہر طرح کے پبلک ٹرانسپورٹ اور پروازیں بند کرنے کا اعلان کیا ہے۔ اس فیصلے کا اطلاق آج ہفتے کے روز مقامی وقت کے مطابق صبح چھ بجے سے ہوگا۔

العربیہ ڈاٹ نیٹ کے مطابق سعودی عرب کی وزارت داخلہ کے ایک سرکاری ذریعے نے بتایا مملکت میں محکمہ صحت کی ہدایت پر احتیاطی تدابیر کے ضمن میں دو ہفتے کے لیے پبلک ٹرانسپورٹ اور اندرون ملک فضائی سروس بند کرنے کا فیصلہ کیا گیا ہے تاکہ 'کرونا' (کوویڈ ۔ 19) وائرس کو مزید پھیلنے سے روکا جا سکے۔

خیال رہے کہ کرونا وائرس اس وقت تیزی کے ساتھ یورپی ملکوں میں پھیل رہا ہے۔ بہ ظاہر چین نے کرونا کے خلاف جنگ جیت لی ہے مگر ایران، اٹلی، جنوبی کوریا اور کئی دوسرے ممالک اس وقت کرونا کے شکنجے میں ہیں۔ مجموعی طور پر اس وقت 170 ممالک میں کرونا کے مریض سامنے آچکے ہیں۔ سعودی عرب میں 238 افراد کرونا کا شکار ہونے کے بعد اسپتالوں میں زیرعلاج ہیں۔

کرونا کی وباء کو مزید پھیلنے سے روکنے کے لیے مملکت میں چلنے والی ٹرانسپورٹس بسیں، ریل گاڑیاں اور اندرون ملک ہوائی جہازوں کی آمد ورفت بند کر دی گئی ہے۔