سعودی عرب میں کرونا متاثرین کی تعداد 1104 ہوگئی، امتحانات وقت پر کرانے کا اعلان

سعودی وزارت صحت نے بتایا ہے کہ جمعہ کی شام تک مملکت میں کرونا وائرس کے متاثرین کی تعداد میں 92 نئے کیسوں کا اضافہ ہوا ہے جس کے بعد کل تعداد بڑھ کر 1104 ہوگئی ہے۔ نئے سامنے آنے والے مریضوں میں 10 غیر ملکی شامل ہیں۔

العربیہ ڈاٹ نیٹ کے مطابق کرونا کے نئے میں الریاض کے 46، مدینہ منورہ کے 19 ، قطیف 10 ، جدہ کے 7، دمام 4 اور بریدہ، ظہران میں دو اور الہفوف اور الخبر میں ایک ایک کیس سامنے آیا ہے۔

وزارت صحت کا کہنا ہے کہ سعودی عرب میں کرونا کے متاثرہ مریضوں کی مجموعی تعداد 1104 ہوگئی ہے۔ ان میں سے بیشتر کی حالت خطرے سے باہر ہے جبکہ چھ کی حالت تشویشناک بیان کی جاتی ہے۔

سعودی عرب میں کرونا وائرس سے کوئی نئی موت ریکارڈ نہیں کی گئی جبکہ مزید دو مریض صحت یاب ہوگئے جس کے بعد صحت یاب ہونے والے مریضوں کی تعداد 35 ہوگئی ہے۔ محکمہ صحت کے حکام کا کہنا ہے کہ کرونا کے مشتبہ 45 ہزار مریضوں کے ٹیسٹ لیے گئے۔

امتحانات شیڈول کے مطابق کرانے کا اعلان

دوسری جانب سعودی عرب میں وزارت تعلیم کا کہنا ہے کہ کرونا وائرس کی وجہ سے امتحانات کا شیڈول تبدیل نہیں ہوگا۔ وزارت تعلیم کا کہنا ہے کہ فاصلاتی تعلیم کا عمل جاری رکھا جائے گا۔

وزارت تعلیم کا کہنا ہے کہ طلبہ کے آن لائن امتحانات کے ساتھ مختلف آپشن موجود ہیں۔ اس حوالے سے 10 رمضان المبارک کی تاریخ مقرر کی گئی ہے۔ فی الحال امتحانات کا شیڈول تبدیل کرنے کا کوئی پروگرام نہیں۔

وزارت تعلیم کے ترجمان کا کہنا تھا کہ طلبہ کی تعلیم کا تسلسل ان کی پہلی ترجیح ہے۔ وہ کرونا کی وبا کی وجہ سے طلبہ کا سال ضائع نہیں ہونے دیں گے۔ ترجمان کا کہنا تھا کہ طلبہ اور طالبات کو فاصلاتی تعلیم کے طریقہ کار پر سختی سے کاربند رہنا چاہیے۔