.

متحدہ عرب امارات: کرونا وائرس سے مزید دو اموات، 41 نئے کیسوں کی تصدیق

پہلی اشاعت: آخری اپ ڈیٹ:

متحدہ عرب امارات نے گذشتہ چوبیس گھنٹے میں کرونا وائرس سے مزید دو اموات اور 41 نئے کیسوں کی اطلاع دی ہے۔

یو اے ای کی وزارت صحت کے مطابق اب تک اس مہلک وائرس سے مرنے والوں کی تعداد پانچ ہوگئی ہے اور کل 611 افراد متاثر ہوئے ہیں۔

وزارت صحت کے مطابق ایک متوفیٰ عرب شہری ہے،اس کی عمر 48 سال تھی اور وہ پہلے سے دل کے عارضے،بلند فشار خون اور ذیابطیس کا مریض تھا۔

دوسرا متوفیٰ ایشیائی مرد تھا، اس کی عمر 42 سال تھی اور وہ بھی دل کے عارضے میں مبتلا تھا۔

یو اے ای کی وزارت صحت کی ترجمان نے کہا ہے کہ اب تک ملک میں دو لاکھ 20 ہزار افراد کے کرونا وائرس کے ٹیسٹ کیے گئے ہیں۔

قبل ازیں ابو ظبی کے محکمہ صحت نے یو اے ای میں آیندہ دس روز میں موبائل ٹیسٹنگ سنٹر قائم کرنے کا اعلان کیا ہے۔

ابوظبی کے ولی عہد شیخ محمد بن زاید نے ہفتے کے روز کرونا وائرس کے ٹیسٹ کے لیے اس نئی مہم کا افتتاح کیا تھا ۔ابو ظبی میں ایک موبائل ٹیسٹ مرکز قائم کیا گیا تھا۔ اس کے ذریعے لوگ اپنی کاروں ہی میں بیٹھے بیٹھے اس مہلک وائرس کا ٹیسٹ کراسکتے ہیں۔