.

خامنہ ای ہم پر برستے ہیں اور ڈیموکریٹس ان کی فنڈنگ کے خواہاں ہیں : امریکی سینیٹر

پہلی اشاعت: آخری اپ ڈیٹ:

امریکا میں ریپبلکن پارٹی کے سینیٹر ٹیڈ کروز نے ڈیموکریٹک خاتون سینیٹر ڈیان وینشٹائن کے اُس بیان کا جواب دیا ہے جس میں انہوں نے صدر ڈونلڈ ٹرمپ کی انتظامیہ سے مطالبہ کیا تھا کہ وہ تہران کے لیے آئی ایم ایف کے قرضے میں رکاوٹ نہ ڈالے۔

کروز نے اپنی ٹویٹ میں خاتون سینیٹر کے خطاب کا حوالہ دیتے ہوئے کہا ہے کہ آیت اللہ علی خامنہ ای "امریکا مردہ باد" کے نعروں کی قیادت کرتے ہیں۔ وہ امریکا کو تباہ کرنے کا عزم رکھتے ہیں اور اسے "سب سے بڑا شیطان" کا نام دیتے ہیں اور ہمارے سینیٹ کے ارکان چاہتے ہیں کہ انہیں (خامنہ ای کو) کروڑوں ڈالر بھیج دیے جائیں؟ ٹھیک اسی موقع پر سینیٹ میں ڈیموکریٹس ارکان امریکا میں چھوٹی کمپنیوں کی مالی معاونت سے متعلق ایک اہم قرارداد کے راستے میں رکاوٹ ڈال رہے ہیں"!

اس سے قبل ڈیموکریٹک خاتون سینیٹر ڈیان وینشٹائن نے اپنی ٹویٹ میں ایک سرکاری بیان منسلک کرتے ہوئے کہا تھا کہ "اس وبائی وائرس نے ایران کو شدید طور پر متاثر کیا ہے۔ ساتھ ہی خطے میں وائرس کے زیادہ پھیلاؤ کا بھی امکان ہے۔ ایسے میں صدر ٹرمپ کو چاہیے کہ وہ کرونا کو قابو کرنے کے واسطے ایران کی جانب سے آئی ایم ایف سے ہنگامی قرضہ حاصل کرنے کی درخواست کو سپورٹ کریں"۔

امریکی نیوز چینل CNN اپنی ایک رپورٹ میں انکشاف کر چکا ہے کہ صدر ٹرمپ کی انتظامیہ آئی ایم ایف کو ایران کے لیے 5 ارب ڈالر کا قرضہ دینے سے روکنے کا ارادہ رکھتی ہے۔

امریکی ذمے داران یہ سمجھتے ہیں کہ مذکورہ رقم واقعتا ایران میں صحت کے بحران کے حل کے لیے استعمال نہیں ہو گی۔

امریکی وزارت خارجہ کے ترجمان نے CNN کو بتایا کہ "دنیا میں دہشت گردی کی سرپرستی کرنے والی ریاست نقد رقوم حاصل کرنے کے واسطے کوشاں ہے۔ اس کا مقصد ایرانیوں کے لیے دوائیں خریدنا نہیں بلکہ بیرون ملک اپنی مہم جوئیوں کی فنڈنگ کرنا ہے"۔