برازیل کی ریاست ریو ڈی جنیرو کے گورنر ولسن ویٹزل کا کہنا ہے کہ وہ کرونا وائرس سے متاثر ہو چکے ہیں۔
ٹویٹر پر پوسٹ کی گئی ایک وڈیو میں 52 سالہ ویٹزل نے کہا کہ "میں جمعے کے روز سے اپنی طبیعت کی خرابی محسوس کر رہا تھا۔ میں نے کوویڈ 19 وائرس کا ٹیسٹ کرایا تو اس کا نتیجہ مثبت آیا ہے ... میں بخار اور حلق میں ورم کے مسئلے سے دوچار تھا اور میری سونگھنے کی حِس ختم ہو گئی تھی۔ خدا کا شکر ہے کہ اب میں اپنی طبیعت بہتر محسوس کر رہا ہوں ... میں نقل و حرکت پر عائد پابندی اور طبی ہدایات کے ساتھ اپنا کام جاری رکھوں گا"۔
ولسن ویٹزل نے پیر کے روز اپنی ریاست ریو ڈی جنیرو میں قرنطینہ کی مدت میں 30 اپریل تک توسیع کا اعلان کیا تھا۔ ریاست کی کُل آبادی 1.6 کروڑ ہے۔
ویٹزل نے اپنے وڈیو پیغام کے اختتام پر ریاست کے لوگوں سے اپیل کی کہ وہ اپنے گھروں میں رہیں۔
ریاست ریو ڈی جنیرو میں اب تک کرونا وائرس کے 3140 کیس سامنے آ چکے ہیں۔ ان میں 224 افراد وفات پا چکے ہیں۔ برازیل میں اس وبائی مرض سے متاثر ہونے والے افراد کی مجموعی تعداد 25262 تک پہنچ چکی ہے۔ ان میں 1532 افراد موت کا شکار ہو چکے ہیں۔
