برطانیہ میں کرونا وائرس کے سبب اموات کی مجموعی تعداد 20 ہزار کی حد کو چُھونے کے قریب ہے۔
گذشتہ روز جمعے کو ہونے والے اعلان کے مطابق 24 گھنٹوں کے اندر کرونا کے مزید 684 مریض دنیا سے رخصت ہو گئے۔ اس طرح برطانیہ میں مذکورہ وبائی مرض میں مبتلا ہو کر مرنے والوں کی کُل تعداد 19506 ہو گئی ہے۔
کرونا سے اموات کی تعداد کا بیس ہزار کی حد سے تجاوز حکومت کے لیے پریشان کن ہو گی۔ حکومت کے ایک سینئر مشیر پیٹرک ویلنس نے 17 مارچ کو کہا تھا کہ کرونا سے اموات کی تعداد کا بیس ہزار سے کم رہنا ایک اچھا نتیجہ ہو گا، ہم اس کے آرزومند ہیں۔
امریکا، اطالیہ، ہسپانیہ اور فرانس کے بعد کرونا کے سبب اموات کی تعداد کے لحاظ سے برطانیہ کا دنیا میں پانچواں نمبر ہے۔ سائنس دانوں کا کہنا ہے کہ اموات کا اوسط چند ہفتوں کے بعد ہی نیچے آنا شروع ہو گا۔
دوسری جانب جرمنی میں روبرٹ کوخ انسٹی ٹیوٹ نے ہفتے کے روز بتایا ہے کہ چوبیس گھنٹوں کے دوران ملک میں کرونا کے 2055 نئے کیس سامنے آئے ہیں۔ اس طرح جرمنی میں کرونا سے متاثرہ افراد کی مجموعی تعداد 152438 ہو گئی ہے۔
ہفتے کے روز اعلان میں یہ بھی بتایا گیا کہ ملک میں کرونا کے مزید 179 مریض فوت ہو گئے۔ اس طرح جرمنی میں اس وبائی مرض کا شکار ہو کر اب تک کُل 5500 افراد اپنی جانیں گنوا چکے ہیں۔
