امریکا کی سابق وزیر خارجہ اور ڈیموکریٹک پارٹی کی سابقہ صدارتی امیدوار ہیلری کلنٹن نے آئندہ صدارتی انتخابات میں سابق نائب صدر جو بائڈن کی حمایت کا اعلان کیا ہے۔
منگل کے روز بائڈن کے ساتھ ایک وڈیو کانفرنس کے دوران ہیلری نے کہا کہ "میں اپنی آواز اُن لوگوں میں شامل کرنا چاہتی ہوں جنہوں نے اس بات کی تائید کی ہے کہ آپ ہمارے صدر ہوں"۔ سابقہ خاتونِ اول نے نومبر کے انتخابات میں بائڈن کے حریف اور موجودہ صدر ڈونلڈ ٹرمپ کی جانب اشارہ کرتے ہوئے کہا کہ " آپ لوگ اس بات کو سوچیں کہ ہمارے پاس ایک حقیقی صدر ہو ،،، محض ایسا شخص نہ ہو جو ٹی وی اسکرین پر صدر کا کردار ادا کرتا ہو"۔
جو بائڈن اس ارادے کا اعلان کر چکے ہیں کہ صدارتی انتخابات جیتنے کی صورت میں وہ اپنے نائب کے طور پر کسی خاتون کو چُنیں گے۔
حالیہ چند ہفتوں کے دوران سابق نائب صدر جو بائڈن کو سابق صدر باراک اوباما ، کانگرس کی اسپیکر نینسی پلوسی اور کئی سینئر سینیٹرز کی سپورٹ حاصل ہو چکی ہے۔
البتہ ہیلری کلنٹن کے شوہر بل کلنٹن نے ابھی تک اعلانیہ طور پر بائڈن کی حمایت نہیں کی ہے۔
