ایران کو جوہری ہتھیاروں کے حصول سے روکنے کے پابند ہیں: امریکا

امریکی وزارت خارجہ نے جمعہ کے روز ایک بیان میں کہا ہے کہ امریکا ایران کو جوہری ہتھیاروں کے حصول سے روکنے کا پابند ہے۔

العربیہ ڈاٹ نیٹ کے مطابق امریکی وزارت خارجہ کی طرف سے جاری ایک بیان میں کہا گیا ہے کہ ایران نے اپنے جوہری عزائم کو کسی حد کے اندر محدود کرنے کا عزم ظاہر نہیں کیا بلکہ پچھلے چند ماہ کے دوران ایران کی جوہری سرگرمیوں میں غیر معمولی اضافہ دیکھا گیا ہے۔

واشنگٹن کا مزید کہنا ہے کہ ایران کا دو جوہری تنصیبات تک عالمی ادارے کے معائنہ کاروں کو رسائی دینے سے انکار انتہائی تشویش کا باعث ہے۔ اس سے کئی سوالات جنم لے رہے ہیں۔ سب سے اہم سوال یہ ہے کہ ایران اپنی جوہری سرگرمیوں کے بارے میں کچھ معاملات عالمی توانائی ایجنسی سے بھی چھپا رہا ہے۔

امریکی وزارت خارجہ کا مزید کہنا ہے کہ ایرانی سرگرمیاں ناقابل قبول ہیں اور ان سے خطرات میں اضافہ ہوا۔ بیان میں زور دے کر کہا گیا ہے کہ واشنگٹن تہران کو جوہری ہتھیاروں کے حصول سے روکنے کا پابند ہے۔

قبل ازیں عالمی توانائی ایجنسی آئی اے ای اے نے ایک قرار داد منظور کی ہے جس میں ایران کے جوہری پروگرام پر کڑی تنقید کی گئی ہے۔ قرارداد میں کہا گیا ہے کہ ایران کا عالمی توانائی ایجنسی کے معائنہ کاروں کو دو جوہری تنصیبات تک رسائی کی اجازت دینے سے انکار جوہری معاہدے کی خلاف ورزی ہے۔