برطانیہ میں ایک چور کو اس وقت پولیس سے مدد مانگنا پڑ گئی جب وہ چوری کی واردات کے بعد فرارکے دوران گھر کی کھڑکی میں پھنس گیا۔
العربیہ ڈاٹ نیٹ کے مطابق یہ واقعہ جنوب مغربی انگلینڈ میں سوینڈن کے مقام پر پیش آیا۔
پولیس کا کہنا ہے کہ 53 سالہ چور فریڈرک مولٹن نے حکام سے رابطہ کیا اور بتایا کہ وہ ایک گھر کی کھڑکی میں پھنسا ہوا ہے۔ اسے وہاں سے نکالنے میں مدد کی جائے۔ پولیس کے مطابق چور نے پولیس سے اس وقت رابطہ کیا جب چوری سے فرار کے دوران کھڑکی میں پھنس گیا۔ اس کا ایک پائوں کھڑکی میں پھنس گیا جس کے بعد وہ الٹا لٹک گیا اس نے پولیس سے 999 ایمرجنسی نمبر پرکال کرکے مدد مانگی۔
مقامی ذرائع ابلاغ کے مطابق چور تک پولیس سے قبل فائر بریگیڈ کا عملہ پہنچا۔ ملزم کو کھڑکی سے نکالنے کے بعد اس کے خلاف کارروائی شروع کردی گئی ہے۔
