سعودی عرب : کرونا وائرس کے 2476 نئے کیس ،4000 مریض صحت یاب

سعودی عرب میں گذشتہ 24 گھنٹے میں کرونا وائرس کے مزید 4000 مریض صحت یاب ہوگئے ہیں اور 2476 نئے کیسوں کی تصدیق ہوئی ہے۔

سعودی وزارت صحت کے مطابق اب کرونا وائرس کے کل کیسوں کی تعداد 255825 ہوگئی ہے۔ان میں سے 207259 تن درست ہوچکے ہیں۔ گذشتہ 24 گھنٹے میں کووِڈ-19 کا شکار مزید 34 مریض وفات پا گئے ہیں اور اب تک اس مہلک وائرس سے اموات کی تعداد 2557 ہوگئی ہے۔

منگل کے روز بھی ساحلی شہر جدہ میں سب سے زیادہ 284 کیسوں کی تصدیق ہوئی ہے۔دارالحکومت الریاض میں 158 ، طائف میں 143 اور مکہ مکرمہ میں 107کیس ریکارڈ کیے گئے ہیں۔ باقی کیسوں کی مملکت کے دوسرے شہروں اور صوبوں میں تصدیق کی گئی ہے۔

سعودی عرب نے گذشتہ ہفتے کرونا وائرس کے نئے تشخیص شدہ کیسوں کی تعداد میں مسلسل کمی اور اس میں استحکام کے پیش نظر اس وبا کے خطرے کی سطح کم کردی تھی۔سعودی عرب میں گذشتہ دو ہفتے کے دوران میں کرونا وائرس کے یومیہ کیسوں کی تعداد میں واضح کمی ریکارڈ کی گئی ہے اور اس طرح اس وائرس کے خطرے کی سطح میں کمی واقع ہوئی ہے۔

اس کی نشان دہی عالمی ماہرین پر مشتمل ٹیموں کے وضع کردہ نقشے سے ہوئی ہے۔ ہارورڈ یونیورسٹی کے گلوبل ہیلتھ انسٹی ٹیوٹ اور ایڈمنڈ جے سفرا مرکز برائے اخلاقیات کی ٹیموں نے دنیامیں کرونا وائرس کے پھیلنے کے رجحانات کی نشان دہی کے لیے یہ نقشہ وضع کیا ہے۔

تحقیقی ماہرین کے فراہم کردہ ڈیٹا کے مطابق جولائی کے اوائل میں سعودی عرب میں کرونا وائرس کے پھیلنے کی سطح نارنجی تھی۔یہ دوسری اعلیٰ ترین سطح ہے۔اس کا یہ مطلب ہے کہ ملک میں وائرس تیزی سے پھیل رہا ہے۔تاہم 13 جولائی کو سعودی عرب میں کرونا وائرس کے پھیلنے کی سطح زرد (ییلو) کردی گئی تھی۔یہ نارنجی سے ایک درجہ کم ہے اور دوسرا کم ترین درجہ ہے۔