بھارت: رن وے پرہوائی جہاز کو حادثہ، طیارہ دو ٹکڑے، پائلٹ سمیت متعدد مسافر ہلاک

بھارتی ریاست کیرالہ کے شہر کالی کٹ کے ہوائی اڈے پر بھارتی فضائی کمپنی کے ایک طیارے کو لینڈنگ کے دوران حادثہ پیش آیا ہے۔ حکام کا کہنا ہے کہ حادثے میں طیارہ دو ٹکڑوں میں تقسیم ہوگیا اور اس کے نتیجے میں 14 افراد ہلاک اور 15 زخمی ہوئے ہیں.

یہ حادثہ مقامی وقت کے مطابق شام سات بج کر 41 منٹ پر پیش آیا ہے اور حادثے کا شکار ہونے والے طیارے پر دس بچوں سمیت 194 مسافر اور عملے کے چھ ارکان سوار ہیں۔ طیارہ حادثے میں ہلاکتوں کی تعداد بڑھنے کا امکان ہے۔

پولیس نے بتایا کہ طیارہ حادثے میں ایک پائلٹ سمیت کم سے کم 15 افراد ہلاک ہوئے ہیں۔ جب کہ درجنوں زخمی ہیں۔ زخمیوں کو اسپتالوں میں داخل کیا گیا ہے۔ حادثے کا شکار ہونے والی ایئر انڈیا کی ایکسپریس پرواز آئی ایکس 1344 جمعے کی شام دبئی سے کالی کٹ کے کوئیکوڈ ہوائی اڈے پہنچی تھی۔ایئر انڈیا کے ترجمان کے مطابق خراب موسم میں اترتے ہوئے طیارہ رن وے سے پھسل کر نیچے جا گرا اور دو ٹکڑے ہوگیا۔

بھارتی ذرائع ابلاغ پر دکھائے جانے والے مناظر میں بوئنگ 737 طیارے کو ٹکڑے ٹکڑے ہوئے دیکھا جا سکتا ہے۔

انڈین خبر رساں ادارے اے این آئی نے سول ایوی ایشن کے ڈائریکٹر جنرل کے حوالے سے خبر دی ہے کہ طیارہ لینڈنگ کے دوران رن وے پر رک نہیں سکا اور گر کر دو ٹکڑے ہو گیا۔

ان کا یہ بھی کہنا تھا کہ جس وقت طیارہ ہوائی اڈے پر اترا تو حدِ نگاہ بہت کم تھی۔ خیال رہے کہ کوئیکوڈ کے ہوائی اڈے کا رن وے ایک پہاڑی پر واقع ہے.