متحدہ عرب امارات کے دارالحکومت ابوظبی میں ایک ریستوراں میں گیس کا ایک سلنڈر غلط تنصیب کی وجہ سے پھٹ گیا ہے جس کے نتیجے میں دو افراد ہلاک اور متعدد زخمی ہوگئے ہیں۔
ابوظبی کے میڈیا دفتر نے ایک ٹویٹ میں اس واقعہ کی اطلاع دی ہےاور کہا ہے کہ ’’ بدقسمتی سے دھماکے کے نتیجے میں دو افراد جان کی بازی ہار گئے ہیں۔ان میں ایک دھماکے کی جگہ کے نزدیک ہی چل بسا ہے۔ دوسرا متوفیٰ ایک راہ گیر تھا اور اس پر دھماکے کے بعد ملبہ گرا تھا۔ہم ان کے خاندانوں سے دلی تعزیت اور ہمدردی کا اظہار کرتے ہیں۔ اللہ تعالیٰ ان کی مغفرت فرمائیں۔‘‘
بیان کے مطابق یہ واقعہ شاہراہ راشد بن سعید پر واقع ایک ریستوراں میں پیش آیا ہے۔ ابوظبی پولیس نے اس کی عمارت کے ارد گرد کے علاقے کو مکینوں سے خالی کرا لیا ہے تاکہ عوام کے تحفظ کو یقینی بنایا جاسکے۔
.@ADPoliceHQ is dealing with an explosion caused by a gas connection in a restaurant on Sheik Rashid Bin Saeed Road. Cases of minor and moderate injuries are being treated in hospital.
— مكتب أبوظبي الإعلامي (@admediaoffice) August 31, 2020
دارالحکومت کے میڈیا دفتر نے یہ بھی اطلاع دی ہے کہ محکمہ حادثات اور تحفظِ عامہ کی ٹیموں نے متاثرہ عمارت اور اس کے ساتھ واقع عمارتوں کا تفصیلی معائنہ کیا ہے تاکہ وہاں موجود رہ جانے والے کسی زخمی کو نکال کر اسپتال منتقل کیا جاسکے۔دھماکے سے بعض افراد شدید زخمی ہوئے ہیں اور بعض کو معمولی زخمی آئے ہیں۔
پولیس نے ابتدائی تحقیقات کے بعد بتایا ہے کہ گیس کے کنٹینر(سلنڈر) کو دوبارہ بھروانے کے بعد غلط طریقے سے لگایا گیا تھا۔اس کی وجہ سے گیس کے اخراج کے بعد وہ دھماکے سے پھٹ گیا ہے۔
ابو ظبی پولیس نے اس سے پہلے ایک بیان میں عوام پر زوردیا تھا کہ ’’وہ واقعے سے متعلق افواہیں نہ پھیلائیں اور صرف سرکاری ذرائع سے حاصل کردہ معلومات پر انحصار کریں۔‘‘