.

فرانس میں 24 گھنٹوں کے دوران 'کوویڈ 19' کے ریکارڈ کیسز کی تصدیق

پہلی اشاعت: آخری اپ ڈیٹ:

فرانسیسی پبلک ہیلتھ ڈائریکٹوریٹ کی طرف سے جمعرات کی شام جاری کردہ اعداد و شمار کے مطابق فرانس میں کرونا وائرس کیسز میں غیرمعمولی اضافہ دیکھا گیا ہے۔ گذشتہ چوبیس گھنٹوں کے دوران ملک میں کوویڈ 19 کے مزید 16،096 نئے کیسوں کی تصدیق کی گئی ہے۔

ہیلتھ ڈائریکٹوریٹ نے بتایا کہ بدھ کے روزکے اعدادو شمار کے بعد اسپتالوں میں زیرعلاج مزید 52 مریض جاں‌ بحق ہوئے ہیں۔ بدھ کے روز 13 ہزار کرونا مریضوں کی تصدیق کی گئی تھی۔

فرانسیسی محکمہ صحت کے مطابق کرونا کے نئے ٹیسٹوں کے دوران گذشتہ ہفتے کی نسبت رواں ہفتے نئے مریضوں کا تناسب 6 اعشاریہ 2 فی صد رہا جب کہ گذشتہ ہفتے یہ تناسب 5 اعشاریہ4 فی صد تھا۔

گذشتہ سات ایام میں 4258 مریضوں کو اسپتال لے جایا گیا۔ بدھ کے روز 718 مریضوں کو تیز بخار کی وجہ سے انتہائی نگہداشت وارڈ میں داخل کیا گیا۔

فرانس میں کرونا کی وبا سے اب تک 31 ہزار 511 افراد ہلاک ہو چکے ہیں۔ ان میں سے 20 ہزار 940 افراد اسپتالوں میں ہلاک ہوئے۔