خادم الحرمین اور ولی عہد کی طرف سے امریکی صدر اور خاتون اول کی عیادت

خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان بن عبدالعزیز نے امریکی صدر ڈونلڈ ٹرمپ اور خاتون اول کے کرونا کا شکار ہونے پران کی خیریت دریافت کی ہے۔

العربیہ ڈاٹ نیٹ کے مطابق سعودی قیادت کی طرف سے ایک برقی پیغام میں امریکی صدر اور ان کی اہلیہ کے کرونا کے شکار ہونے پران کے لیے نیک تمنائوں کا اظہار کیا گیا ہے۔ خادم الحرمین الشریفین اور ولی عہد نے امریکی صدر اور ان کی اہلیہ کی جلد صحت یابی کی دعا کی اور انہیں ہرمشکل اور مصیبت سے محفوظ رہنے کی کی خواہش کا اظہار کیا ہے۔

ولی عہد شہزادہ محمد بن سلمان کی طرف سے جاری ایک برقی پیغام میں امریکی صدر ڈونلڈ ٹرمپ اور ان کی اہلیہ کی کرونا سے جلد صحت یابی کی دعا کی۔ ان کا کہنا تھا کہ توقع ہے کہ امریکی صدر اور خاتون اول جلد اس وبا کو شکست سےدوچار کریں گے۔

خیال رہے کہ کل جمعہ کو وائٹ ہائوس نے امریکی صدر ڈونلڈ ٹرمپ اور میلانیا ٹرمپ کے 'کوویڈ -19' کا شکارہونے کی تصدیق کی تھی۔

جمعہ کی شام کو امریکی صدر کو ایک ہیلی کاپٹر کی مدد سے واشنگٹن کے قریب ایک فوجی اسپتال منتقل کیا گیا تھا جہاں ان کا طبی معائنہ کیا گیا۔