پولینڈ کے صدر آنجے ڈوڈا کرونا وائرس کا شکار ہو گئے

پولینڈ میں کرونا وائرس کے مثبت کیسوں میں تیزی کے بعد ملک کے صدر آنجے ڈوڈا بھی عالمی وبا کے وار سے محفوظ نہ رہ سکے۔ آنجے ڈوڈا کا کرونا ٹیسٹ مثبت آیا ہے۔

صدارتی دفتر کے سیکرٹری آف سٹیٹ بلیزے سپائی چالسکی نے ٹویٹر پیغام میں بتایا کہ ’’خواتین وحضرات! صدر @AndrzejDuda [آنجے ڈوڈا] کو کرونا وائرس کا ٹیسٹ کرانے کا مشورہ دیا گیا تھا،ٹیسٹ کا نتیجہ مثبت آیا ہے۔ صدر خیریت سے ہیں۔‘‘

یہ واضح نہیں ہو سکا کہ آنجے ڈوڈا کب کرونا میں مبتلا ہوئے۔ انھوں نے گذشتہ سوموار کو ٹالن میں ایک سرمایہ کاری فورم میں شرکت کی تھی جہاں ان کی ملاقات بلغاریہ کے صدر رومن رادیف سے ہوئی تھی۔ صدر رادیف نے بعد ازاں خود کو قرنطینہ کر لیا تھا۔
پولینڈ میں ہفتے کے روز سے ’’ریڈ زون‘‘ لاک ڈاؤن نافذ کر دیا گیا ہے جس کے تحت جزوی طور پر پرائمری سکول اور ریستوران بند کیے جا رہے ہیں۔

اٹھتیس ملین نفوس پر مشتمل یورپی یونین کے رکن ملک بلغاریہ میں چوبیس گھنٹوں کے دور جمعہ کے روز 13632 کرونا وائرس کے کیسز ریکارڈ کیے گئے۔

پولینڈ کے نیشنل اسٹیڈیم کو وارسا کے لیے فیلڈ ہسپتال میں تبدیل کیا جا رہا ہے۔ کرونا وائرس کے مریضوں کی تعداد میں تیز رفتار اضافہ سے صحت کی سہولتوں کے نظام پر بوجھ بڑھ رہا ہے جسے کم کرنے کے لیے حکومت دیگر مقامات پر بھی عارضی میڈیکل سہولیات فراہمی کے لیے کوشاں ہے۔