ہسپانوی وزیراعظم اور پاپائے روم میں ملاقات کے دوران ماسک نہ پہننے پر تنازع

ہفتے کے روز اسپین کے وزیراعظم پیڈرو سانچیز نے ویٹی کن میں پاپائے روم سے ایک حکومتی وفد کے ہمراہ ملاقات کی مگر ان کے ملاقاتیوں کا کرونا سے بچاؤ کے لیے ضروری چہرے پر ماسک نہ پہننے پر سخت تنقید کی جا رہی ہے۔

ماسک کے بغیر یہ ملاقات ایک ایسے وقت میں‌ ہوئی ہے جب اسپین میں کرونا کے متاثرین کی تعداد 10 لاکھ سے تجاوز کرگئی ہے اور اسپین کو کرونا سے یورپ کا سب سے زیادہ متاثرہ ملک قرار دیا جا رہا ہے۔

حیرت کی بات یہ ہے کہ جس مقام پر ویٹی کن میں پائے روم اور ہسپانوی وفد کے درمیان ملاقات ہوئی اسی مقام پر کچھ وقت پہلے ہونے والی ایک ملاقات میں سوئٹرزلینڈ کے 13 افراد میں کرونا کی تصدیق ہوئی تھی۔

ہسپانوی وزیراعظم ویٹی کن میں پاپائے روم کے دفتر کے صحن میں پہنچے تو انھوں‌ نے ماسک پہن رکھا تھا مگر ملاقات میں کسی کو ماسک میں نہیں دیکھا گیا۔

ویٹی کن نے کہا کہ ملاقات میں موجودہ صحت کی ہنگامی صورتحال، یورپی اتحاد کے عمل اور امیگریشن" سمیت دیگر امور پر تبادلہ خیال کیا گیا۔

پوپ فرانسیس نے ایک تقریر میں سیاست کو ایک رفاہی اور عمدہ عمل قرار دیا اور کہا کہ سیاستدان کا کام قوم کو آگے بڑھنے میں مدد کرنا ہے۔