اماراتی ولی عہد کا سوڈان کے امن اورخوشحالی میں ہرممکن مدد فراہم کرنے کا اعلان

متحدہ عرب امارات کے ولی عہد الشیخ محمد بن زاید آل نھیان نے کہا ہے کہ ان کا ملک سوڈان کے امن ،سلامتی، ترقی اور خوشحالی کے لیے ہر ممکن مدد فراہم کرے گا۔

العربیہ ڈاٹ نیٹ کےمطابق امارات کے ولی عہد نے ان خیالات کا اظہار گذشتہ روز سوڈان کےعبوری وزیراعظم عبداللہ حمدوک سے ٹیلیفون پر بات چیت کے دوران کیا۔ انہوں نے کہا کہ امارات برادر ملک سوڈان کی ترقی اور امن کے لیے تمام وسائل کو بروئے کار لانے کی کوشش کرتے ہوئے سوڈانی عوام کی امن اور ترقی کے حصول کی امنگوں میں ان کی مدد کرے گا۔

امارات کی سرکاری نیوز ایجنسی 'وام' کے مطابق دونوں رہ نمائوں کے درمیان ٹیلیفون پر ہونے والی بات چیت میں دو طرفہ تعاون، خطے کی تازہ صورت حال، علاقائی اور عالمی مسائل کے ساتھ باہمی دلچسپی کے دیگر امور پر تبادلہ خیال کیا گیا۔

الشیخ محمد نے سوڈانی وزیراعظم کو خرطوم اور جنوبی سوڈان کے درمیان چند ہفتے قبل امن معاہدہ کرنے پرمبارک باد پیش کی۔

دوسری طرف سوڈانی وزیراعظم عبداللہ حمدوک نے اماراتی ولی عہد کی طرف سے سوڈانی عوام کی ہرممکن مدد کی فراہمی کے اعلان پران کا خصوصی شکریہ ادا کیا۔ ان کا کہنا تھا کہ آنے والے عرصے میں امارات اور سوڈان کےدرمیان برادرانہ تعلقات اور روابط میں مزید وسعت آئے گی اور دونوں ملکوں اور اقوام کو ایک دوسرے کے قریب آنے کا موقع ملے گا۔