سعودی عرب میں دراندازی کرکے آگ لگانے میں‌ ملوث 3 غیرملکی شرپسند گرفتار

سعودی عرب کی پولیس نے جنوبی علاقے عسیر میں سرحد پار سے دراندازی کرکےوسیع پیمانے پر آگ لگانے میں ملوث تین ایتھوپیائی باشندوں کو گرفتارکیا ہے۔

العربیہ ڈاٹ نیٹ کے مطابق غیرملکی شرپسندوں نے عسیر کی تنومہ گورنری میں گھس کر آگ لگا دی جس کے نتیجے میں 47 لاکھ مربع میٹر کے علاقے پر آگ بھڑک اٹھی اور بڑے پیمانے پر جنگی جڑی بوٹیاں جل کر راکھ ہو گئیں۔

پولیس کا کہنا ہے کہ آگ لگانے والے ملزمان کی نشاندہی اور شناخت کے بعد ان کے خلاف کارروائی کرکے انہیں گرفتار کرلیا گیا ہے۔ ملزمان کے خلاف قانون کے مطابق کارروائی شروع کردی گئی ہے۔

سعودی عرب کی وزارت داخلہ نے ایک بیان میں کہا ہے کہ مملکت کے استحکام اور سلامتی کو نقصان پہنچانے والے عناصرسے کوئی رعایت نہیں برتی جائے گی۔ سیکیورٹی ادارے الرٹ ہیں اور سرحدی دراندازی اور تخریب کاری کی کارروائیوں‌پر گہری نظر رکھے ہوئے ہیں۔