.

مسجد حرام: سعودی مرد و خواتین رضاکار معتمرین کو طبی خدمات فراہم کرنے میں مصروف

پہلی اشاعت: آخری اپ ڈیٹ:

سعودی ہلالِ احمر تنظیم کے رضاکار مسجد حرام میں معتمرین اور نمازیوں کو طبی خدمات اور ابتدائی ہنگامی امداد پیش کرنے میں بڑھ چڑھ کر حصہ لے رہے ہیں۔

ان رضاکاروں نے بیت اللہ کے زائرین کی خدمت، انہیں راحت و آرام پہنچانے اور ہر طرح کی مطلوب طبی خدمات فراہم کرنے کی ذمے داری اپنے کاندھوں پر لے رکھی ہے۔

رضاکاروں کی جانب سے پیش کی جانے والی طبی خدمات میں تھکن، ذیابیطس، بلند فشار خون اور لُو کا شکار افراد کی مدد کے علاوہ دیگر ابتدائی ہنگامی امداد شامل ہے۔

سعودی ہلال احمر تنظیم نے بیت اللہ کا رخ کرنے والے افراد کو خدمات پیش کرنے کے لیے مرد اور خواتین رضاکاروں کا بہترین انتظام کیا ہے۔

مکہ مکرمہ صوبے میں ہلال احمر تنظیم کی رضاکارانہ انتظامیہ کی ڈائریکٹر ہناء الشمرانی کے مطابق رضاکاروں کی ٹیم میں ڈاکٹرز اور ہنگامی طبی امداد فراہم کرنے والا عملہ شامل ہے۔ ان افراد کو برقی رضاکار نظام کے راستے طلب کیا جاتا ہے۔

اس وقت حرم مکی میں ہنگامی طبی خدمات پیش کرنے کے لیے 50 رضاکاروں کی ٹیم سرگرم ہے۔ حرم مکی میں مختلف مقامات پر ہلال احمر کے رضاکاروں کو متعین کیا گیا ہے۔