.

کینیڈا: یرغمالیوں کے سبب پیدا ہونے والی افراتفری محض ایک مذاق نکلا!

پہلی اشاعت: آخری اپ ڈیٹ:

عالمی ذرائع ابلاغ اور خبر رساں ایجنسیاں گذشتہ کئی گھنٹوں سے کینیڈا کے شہر مونٹریال میں یرغمالیوں کو زیر حراست رکھنے کی خبر کے حوالے سے مصروف رہیں۔ اس دوران پولیس بھی الرٹ ہو گئی۔ تاہم اب یہ بات سامنے آئی ہے کہ یہ سب محض ایک دھوکا تھا۔

کینیڈا کی پولیس نے جمعے کے روز مونٹریال شہر میں ایک عمارت کو خالی کرا لیا۔ پولیس کو ہنگامی طور پر اطلاع دی گئی تھی کہ وہاں بعض افراد کو یرغمالی بنا لیا گیا ہے۔ اس عمارت میں وڈیو گیمز بنانے والی معروف فرانسیسی کمپنی یوبیوسوفٹ کا دفتر بھی واقع ہے۔ تاہم بعد ازاں یہ بات ظاہر ہوئی کہ مذکورہ اطلاع محض ایک دھوکا تھا۔ یہ تمام تفصیلات کینیڈا کی پولیس نے ہفتے کے روز جاری ایک بیان میں بتائی۔

ہنگامی اطلاع ملتے ہی پولیس نے عمارت کو گھیرے میں لے لیا تھا۔ پولیس کے مطابق عمارت میں کسی قسم کے خطرے کا انکشاف نہیں ہوا اور کسی شخص کے زخمی ہونے کی بھی کوئی اطلاع موصول نہیں ہوئی۔ پولیس اس ٹیلی فون کال کے حوالے سے تحقیقات کر رہی ہے جس نے سیکورٹی فورس کی ایک بھاری نفری تعینات کرنے پر مجبور کر دیا۔

ابھی تک جھوٹی اطلاع پر مبنی اس "مذاق" کو کرنے والے شخص کے بارے میں تفصیلات سامنے نہیں آ سکی ہیں!